Kryeministri i Izraelit, Benjamin Netanyahu, i ka premtuar kryeministrit të Katarit, Mohammed bin Abdulrahman bin Jassim Al Thani, se Izraeli nuk do të kryejë më sulme në territorin e Katarit, kanë konfirmuar burime diplomatike.
Sipas raportimit të Amichai Stein, Netanyahu ka dhënë këto garanci gjatë një bisede të ndërmjetësuar nga Shtëpia e Bardhë, ku ai ishte mysafir i presidentit amerikan Donald Trump.
Sipas medias Axios, Izraeli do të paguajë edhe dëmshpërblim për familjen e punonjësit të sigurisë nga Katari që u vra në sulmin izraelit në Dohë më 9 shtator. Pikërisht ky incident shkaktoi reagime të ashpra në Doha dhe solli ndërprerjen e ndërmjetësimit të Katarit në negociatat me Hamasin.
Shtëpia e Bardhë njoftoi se Trump ishte nikoqir i një bisede telefonike trilaterale mes Netanyahut dhe kryeministrit të Katarit, gjatë së cilës lideri izraelit shprehu keqardhje të thellë për sulmin.
Netanyahu shprehu keqardhje që Izraeli kishte shkelur sovranitetin e Katarit dhe deklaroi se Izraeli nuk do ta përsërisë një sulm të tillë në të ardhmen.
Sipas burimeve amerikane, Netanyahu theksoi se objektivi i goditjes ishte Hamasi, por vdekja e zyrtarit të sigurisë nga Katari ishte një pasojë e paqëllimshme dhe tragjike.
Është interesante se pikërisht ky sulm, i cili përkohësisht ndaloi ndërmjetësimin e Katarit, krijoi një dinamikë të re në rajon dhe i dha shtysë të re për arritjen e një marrëveshjeje gjithëpërfshirëse për përfundimin e luftës në Gaza, shpreson Trump, i cili gjatë vizitës së Netanyahut në Shtëpinë e Bardhë mund të shpallë përparime në negociata.
Sipas burimeve, Trump kishte zhvilluar bisedime edhe me emirin e Katarit para mbërritjes së Netanyahut në Uashington, ndërsa të hënën në Shtëpinë e Bardhë mbërriti edhe një delegacion nga Katari për të vazhduar negociatat mbi planin amerikan të paqes.
