Fotografia e kryeministrit izraelit Benjamin Netanyahu gjatë një bisede telefonike u bë shpejt temë kryesore diskutimi në rrjetet sociale dhe në qarqet ndërkombëtare. Detaji që nuk i shpëtoi askujt ishte shiriti i ngjitur mbi kamerën e telefonit të tij.
Edhe pse në shikim të parë kjo duket e pazakontë për udhëheqësin e një shteti teknologjikisht të avancuar, ekspertët theksojnë se bëhet fjalë për një masë strikte sigurie. Besohet se Netanyahu përdor shiritin për të parandaluar filmime të paautorizuara në zona sensitive, sulme hakerësh përmes të cilave kamera mund të aktivizohet nga distanca, si dhe mbikëqyrjen digjitale dhe mbledhjen e të dhënave vizuale konfidenciale.
Ky veprim nuk është rast i izoluar. Një numër gjithnjë e më i madh politikanësh të lartë dhe zyrtarësh të sigurisë në mbarë botën po i drejtohen metodave të ngjashme “analoge” të mbrojtjes në epokën digjitale. Në një kohë kur softuerë të sofistikuar spiunazhi si Pegasus janë bërë kërcënim real, edhe pengesa më e thjeshtë fizike – si një copë shirit – konsiderohet një barrierë efektive.
“ Në botën e politikës së lartë, privatësia e komunikimit nuk ka çmim. Kamera e mbuluar është një sinjal i qartë se askush, as kryeministri, nuk është imun ndaj ndërhyrjeve digjitale potenciale,” theksojnë analistët e sigurisë.
Ndërsa disa e lavdërojnë kujdesin e kryeministrit dhe vetëdijen për sigurinë kibernetike, të tjerë në rrjetet sociale komentojnë me ironi faktin që udhëheqësi i një prej fuqive kryesore botërore në fushën e teknologjisë kibernetike duhet të përdorë shirit ngjitës për t’u ndier i sigurt.
Kjo fotografi ka rihapur gjithashtu debatin më të gjerë mbi cenueshmërinë e telefonave inteligjentë dhe rreziqet ndaj të dhënave personale, jo vetëm për zyrtarët shtetërorë, por për të gjithë përdoruesit.
