Një zyrtar amerikan deklaroi të martën për CBS News se qeveria e Ukrainës “ka pranuar një marrëveshje paqeje” të ndërmjetësuar nga administrata e Donald Trump për t’i dhënë fund gati katër viteve të sulmit rus.
Zyrtari amerikan dhe këshilltari ukrainas për siguri kombëtare, Rustem Umerov, thanë se është arritur një marrëveshje e përbashkët mbi propozimin, ndërsa detajet ende duhet të finalizohen.
Umerov shprehu optimizëm se presidenti ukrainas Volodimir Zelensky mund të udhëtojë në Washington para fundit të nëntorit për të nënshkruar marrëveshjen. CBS News raportoi të dielën se zyrtarët amerikanë dhe ukrainas kishin diskutuar më herët për një vizitë të mundshme të Zelenskyt në SHBA këtë javë.
“Ukrainasit kanë pranuar marrëveshjen e paqes. Ka disa detaje të vogla për t’u zgjidhur, por janë pajtuar”, tha zyrtari amerikan për CBS News.
Lajmi erdhi ndërsa sekretari amerikan i ushtrisë, Dan Driscoll, ndodhej në Abu Dhabi në takime me zyrtarë rusë, konfirmuan dy zyrtarë amerikanë dhe dy burime diplomatike të paautorizuara të flasin publikisht. Një burim i pestë, i njohur me bisedimet, konfirmoi gjithashtu praninë e Driscollit në kryeqytetin e Emirateve të Bashkuara Arabe.
Nuk pati reagim të menjëhershëm nga Rusia, forca pushtuese, lidhur me atë që ishte diskutuar në Abu Dhabi.
Gjatë një konference me gazetarët të martën, ministri i jashtëm rus Sergej Lavrov tha se, megjithëse Rusia “vlerëson qëndrimin e SHBA-së që po merr iniciativën në zgjidhjen e konfliktit”, Moska “vepron profesionalisht dhe nuk publikon informacion para se të arrihen marrëveshje formale… Rusia pret që SHBA ta informojë së shpejti për rezultatet e konsultimeve me Ukrainën dhe Evropën”.
Një zyrtar ushtarak amerikan në Abu Dhabi i tha CBS News se Driscoll kaloi orë të tëra të martën në negociata me përfaqësuesit rusë, duke hyrë e dalë në takime gjatë gjithë ditës.
“Jemi shumë optimistë. Sekretari Driscoll është optimist. Shpresojmë të marrim përgjigje së shpejti nga rusët. Procesi po ecën shpejt”, tha zyrtari.
Nuk dihet saktësisht kush tjetër ishte pjesë e delegacionit amerikan në Abu Dhabi. Zyrtari amerikan tha për CBS News se atje ishte edhe një delegacion ukrainas që ishte në kontakt me Driscollin dhe ekipin e tij.
Umerov deklaroi të martën në rrjetet sociale se negociatorët ukrainas “kanë arritur marrëveshje të përbashkët për kushtet bazë” të marrëveshjes për të cilën zyrtarët amerikanë, evropianë dhe ukrainas diskutuan fundjavën e kaluar në Gjenevë.
Progresi i dukshëm në Abu Dhabi vjen në kohën e rritjes së presionit nga presidenti Trump për të siguruar një armëpushim në luftën pothuajse katërvjeçare mes Rusisë dhe Ukrainës.
“Tani llogarisim në mbështetjen e partnerëve tanë evropianë për hapat e ardhshëm. Presim të organizojmë sa më shpejt vizitën e presidentit ukrainas në SHBA gjatë nëntorit për të finalizuar detajet dhe për të arritur marrëveshjen me presidentin Trump”, tha Umerov në platformën X.
Burime të njohura me situatën i thanë CBS News se Driscoll po punon në Abu Dhabi mbi një version të rishikuar të propozimit me 28 pika të Shtëpisë së Bardhë, pas negociatave produktive në Gjenevë.
Gjatë fundjavës, Driscoll, sekretari i shtetit Marco Rubio, i dërguari i Trumpit Steve Witkoff, dhëndri i presidentit Jared Kushner dhe diplomatë nga Ukraina dhe aleatët evropianë morën pjesë në bisedimet në Gjenevë, Zvicër. Takimi i Driscollit me zyrtarët rusë erdhi gjithashtu pas vizitës së javës së kaluar në Kiev.
Zyrtarët amerikanë dhe ukrainas kishin diskutuar më herët edhe një vizitë të mundshme të Zelenskyt në SHBA këtë javë, raportoi CBS News të dielën.
Javën e kaluar, CBS News siguroi një draft të propozimit të mbështetur nga administrata Trump për t’i dhënë fund luftës.
Plani përfshinte disa kushte që Zelensky i kishte refuzuar më parë, si dorëzimi i të gjithë rajonit të Donetskut – përfshirë zonat që Rusia nuk i kontrollon – dhe ndërprerjen e përpjekjeve të Ukrainës për t’u anëtarësuar në NATO.
Ekziston gjithashtu një dokument shoqërues për garancitë e sigurisë, sipas zyrtarëve amerikanë dhe ukrainas. Olga Stefanishina, ambasadorja e Ukrainës në SHBA, tha të dielën në “Face the Nation” se dokumenti parashikon që SHBA të ofrojë “garanci sigurie” që janë në linjë me Nenit 5 të NATO-s, i cili detyron shtetet anëtare të mbrojnë çdo vend të sulmuar të aleancës.
Të shtunën, disa vende anëtare të NATO-s dhe aleatë të SHBA-së publikuan një deklaratë të përbashkët duke e quajtur planin e propozuar “bazë që kërkon më shumë punë”.
Shtëpia e Bardhë tha të dielën se zyrtarët amerikanë dhe ukrainas “kanë hartuar një kornizë të përditësuar dhe të saktësuar të marrëveshjes së paqes” pas bisedimeve në Gjenevë. Rubio e quajti një nga sesionet “shumë të rëndësishme”, por shtoi se “ende ka punë për të bërë”.
Presidenti Trump ka ushtruar presion që marrëveshja të arrihet deri në Ditën e Falënderimeve, megjithëse Rubio tha të dielën se ky afat është fleksibël.
Një zyrtar amerikan tha për CBS News se presidenti rus Vladimir Putin beson se do të marrë kontrollin e Donetskut, qoftë përmes negociatave, qoftë përmes fushëbetejës. Negociatat e administratës Trump në Gjenevë nisën duke supozuar se Putin kishte të drejtë.
Ndërsa zyrtari amerikan refuzoi të jepte vlerësim për atë nëse Ukraina po humb terren në lindje, ai tha se dinamika e luftimeve tregon se Rusia pritet të marrë Donetskun.
Zyrtari gjithashtu përmendi përparimin rus në qytetin lindor Pokrovsk, një nyje logjistike për Ukrainën, dhe e cilësoi këtë si një shenjë të keqe për mbrojtjen e Kievit. Mediat ruse shpesh e quajnë Pokrovskin “hyrja” e rajonit industrial të Donbasit.
