Zyrtarë amerikanë, të cilët folën për Reuters në kushte anonimiteti, kanë deklaruar se ushtria e SHBA-së po përgatitet për mundësinë e operacioneve të zgjatura, që mund të zgjasin me javë, kundër Iranit, nëse presidenti Donald Trump lëshon urdhër për sulm.
Planifikimi i një fushate të mundshme kundër Iranit, për të cilën zyrtarët nuk pranuan të identifikohen për shkak të ndjeshmërisë së çështjes, rrit më tej tensionet në kuadër të iniciativës aktuale diplomatike midis Washingtonit dhe Teheranit.
Sipas raportimit, qëllimi i përgatitjeve është që, në rast urdhri, ushtria të jetë në gjendje të kryejë jo vetëm goditje të vetme, por një seri operacionesh të vazhdueshme që do të zgjasnin për disa javë.
Shtetet e Bashkuara dhe Irani së fundmi kanë rifilluar kontaktet përmes bisedimeve në Oman, duke synuar ringjalljen e diplomacisë rreth programit bërthamor iranian. Këto zhvillime vijnë pasi Trump dërgoi forca shtesë ushtarake në rajon, duke shtuar frikën për një konflikt të ri.
Zyrtarët njoftuan se Pentagoni ka vendosur të dërgojë një aeroplanmbajtëse shtesë në Lindjen e Mesme, së bashku me mijëra trupa, avionë luftarakë, shkatërrues me raketa të drejtuara dhe kapacitete të tjera sulmuese e mbrojtëse.
E pyetur për përgatitjet e mundshme, zëdhënësja e Shtëpisë së Bardhë, Anna Kelly, deklaroi: “Presidenti Trump i ka të gjitha opsionet mbi tryezë kur bëhet fjalë për Iranin.” Ajo shtoi se presidenti dëgjon perspektiva të ndryshme, por vendimi përfundimtar merret në bazë të interesit kombëtar dhe sigurisë.
Pentagoni nuk pranoi të komentojë këto pretendime.
Operacioni i muajit qershor, i quajtur “Çekiçi i Mesnatës”, u përshkrua si një goditje e vetme amerikane, gjatë së cilës bombardues të padukshëm u nisën nga SHBA dhe goditën objekte bërthamore iraniane. Pas kësaj, Irani kreu një sulm të kufizuar hakmarrës ndaj një baze amerikane në Katar.
Sipas burimeve, planifikimi aktual është dukshëm më kompleks. Në rast të një fushate të zgjatur, objektivat mund të përfshijnë edhe institucione shtetërore dhe të sigurisë së Iranit, jo vetëm infrastrukturën bërthamore.
I njëjti burim paralajmëron se rreziqet për forcat amerikane do të ishin shumë më të mëdha, duke pasur parasysh arsenalin raketor të Iranit dhe mundësinë e përshkallëzimit rajonal.
Zyrtarët theksojnë se SHBA-ja pret plotësisht një kundërpërgjigje iraniane dhe një shkëmbim të mundshëm goditjesh për një periudhë të caktuar.
Trump ka kërcënuar në mënyrë të përsëritur Iranin për shkak të programit bërthamor dhe raketor balistik, duke deklaruar së fundmi se alternativa ndaj diplomacisë “do të ishte shumë traumatike”.
Ndërkohë, kryeministri izraelit Benjamin Netanyahu, gjatë takimit me Trump në Washington, ka theksuar se çdo marrëveshje me Iranin duhet të përfshijë elemente jetike për Izraelin.
Nga ana tjetër, Irani ka deklaruar se është i gatshëm të diskutojë kufizime mbi programin e tij bërthamor në këmbim të heqjes së sanksioneve, por ka refuzuar lidhjen e kësaj çështjeje me programin raketor.
