Pasi presidenti amerikan Donald Trump të dielën në mbrëmje (sipas kohës së Evropës Qendrore) njoftoi fillimin e “Projektit Liria” në Ngushticën e Hormuzit — një projekt që synon të nxjerrë anijet e bllokuara nga kjo zonë — reagoi edhe ushtria amerikane.
Në një deklaratë, CENTCOM theksoi se ushtria amerikane do të mbështesë projektin e Trumpit dhe se përmes tij do të rikthehet liria e lundrimit për anijet tregtare në këtë korridor të rëndësishëm ndërkombëtar.
“Misioni, i udhëhequr nga presidenti, do të mbështesë anijet tregtare që dëshirojnë të kalojnë lirshëm nëpër këtë rrugë kyçe të tregtisë ndërkombëtare. Një e katërta e tregtisë botërore të naftës detare dhe sasi të konsiderueshme karburanti e plehrash transportohen përmes kësaj ngushtice”, thuhet në deklaratë.
Me rastin e nisjes së misionit foli edhe admirali Brad Cooper.
“Mbështetja jonë për këtë mision mbrojtës është thelbësore për sigurinë rajonale dhe ekonominë globale, ndërkohë që ruajmë edhe bllokadën detare”, tha ai.
Javën e kaluar, Departamenti Amerikan i Shtetit njoftoi një iniciativë të re, në partneritet me Ministrinë e Mbrojtjes, për të përmirësuar koordinimin dhe shkëmbimin e informacionit mes partnerëve ndërkombëtarë në mbështetje të sigurisë detare në këtë zonë. Ky koncept synon të kombinojë diplomacinë me koordinimin ushtarak, çka do të jetë thelbësore gjatë “Projektit Liria”.
Mbështetja ushtarake amerikane për këtë projekt do të përfshijë shkatërrues me raketa të drejtuara, mbi 100 avionë tokësorë dhe detarë, platforma pa pilot në shumë fusha operimi dhe rreth 15.000 trupa ushtarake.
