Sheshi kryesor në qytetin Graz të Austrisë u bllokua plotësisht për rreth dy orë pas një njoftimi për bombë, njoftoi policia lokale.
Drejtoria e Policisë së Steiermarkut për portalin austriak 5 Minuten deklaroi:
“Ekziston një kërcënim për bombë. Aktualisht nuk mund të themi se sa gjatë do të mbetet zona e mbyllur.”
Në vendngjarje ndodheshin forca të shumta policore, përfshirë qen gjurmues, si dhe një numër i madh ekipesh të urgjencës mjekësore.
Për shkak të bllokimit, u pezulluan disa linja të tramvajit dhe të transportit publik që kalojnë nëpër qendër të qytetit.
Kompania e transportit publik Holding Graz organizoi një linjë alternative autobusi për të siguruar lëvizjen gjatë periudhës së ndërprerjes.
Pas dy orësh, zona u rihap dhe u konfirmua se njoftimi për vendosjen e bombës ishte i rremë.
Hetimet për rastin po vazhdojnë.
