Shtetet e Bashkuara të Amerikës muajt e fundit kanë rritur ndjeshëm praninë ushtarake rreth Venezuelës në kuadër të operacionit “Southern Spear”, i cili zyrtarisht është paraqitur si një fushatë e gjerë kundër narkotrafikut.
Megjithatë, sipas analistëve, përmasat, struktura dhe dinamika e forcave të dislokuara gjithnjë e më shumë tregojnë për një konfigurim operacional që tejkalon dukshëm misionet standarde të ndërprerjes së trafikut të drogës.
Anijet e para mbërritën në Detin e Karaibeve më 19 gusht 2025 dhe që prej asaj kohe dislokimi është zgjeruar vazhdimisht. Sipas vlerësimeve, deri më 12 dhjetor në rajon ndodhen mes 12.000 dhe 15.000 pjesëtarë të forcave amerikane – marinarë, marinsa dhe ushtarë – të dislokuar në Porto Riko, Ishujt e Virgjër Amerikanë dhe në ujërat ndërkombëtare pranë Venezuelës.
SHBA-ja ka përfshirë në operacion më shumë se një duzinë anijesh luftarake, që përfaqësojnë rreth 10 deri në 20 për qind të flotës aktive të marinës amerikane. Elementi më i dukshëm i këtij dislokimi është mbërritja e aeroplanmbajtëses USS Gerald R. Ford, më e madhja në flotën amerikane, e cila më 16 nëntor hyri në zonën operative së bashku me më shumë se 75 mjete ajrore dhe mbi 5.000 anëtarë ekuipazhi. Ajo shoqërohet nga tre shkatërrues të pajisur me raketa lundruese Tomahawk.
Shtyllën shtesë të fuqisë detare e përbëjnë tre shkatërrues të klasës Arleigh Burke, një kryqëzor, një anije luftarake bregdetare si dhe anije amfibe desantuese nga Iwo Jima Ready Group, me rreth 2.500 marinsa dhe edhe një mijë pjesëtarë të marinës.
Zgjerimi i epërsisë ajrore
Gjatë vjeshtës dhe dimrit është rritur edhe prania ajrore amerikane. Në shtator, avionë F-35 Lightning II u dislokuan në Porto Riko, ndërsa valë të reja kanë mbërritur në dhjetor në disa aeroporte rajonale.
Bombarduesit strategjikë amerikanë B-52 Stratofortress dhe B-1 Lancer kanë kryer patrullime bregdetare gjatë tetorit dhe nëntorit, ndërsa më 10 dhjetor u regjistrua fluturimi më i afërt deri tani i avionëve luftarakë amerikanë pranë Venezuelës: dy F/A-18 Super Hornet zhvilluan një stërvitje 30-minutëshe mbi Gjirin e Venezuelës, rreth 150 milje nga hapësira ajrore venezueliane.
Pamjen operative e plotësojnë dronët MQ-9 Reaper, avionët patrullues detarë P-8 Poseidon, avionët zbulues RC-135, si dhe avionët sulmues AC-130. Këto platforma veprojnë nga Porto Riko dhe Salvadori që nga tetori.
Analistët i kushtojnë vëmendje të veçantë elementeve të dislokimit që tregojnë për një përgatitje operative shumë më komplekse. Që nga shtatori në rajon ndodhet edhe një nëndetëse sulmuese bërthamore, ndërsa në operacion është përfshirë edhe një anije speciale për mbështetjen e njësive speciale, e njohur si “The Ghost”.
Zbulimi elektronik, operacionet speciale dhe misionet e kërkim-shpëtimit mbështeten nga mjete ajrore që janë regjistruar në distanca më të vogla se 90 milje nga bregu venezuelian.
Sipas burimeve amerikane, këto forca tashmë janë angazhuar edhe në veprime konkrete. Që nga 1 shtatori 2025 janë kryer rreth dhjetë sulme ndaj anijeve të dyshuara për kontrabandë droge, ku kanë humbur jetën 87 persona. Operacioni më i fundit u regjistrua më 10 dhjetor, kur roja bregdetare dhe marina amerikane, me mbështetjen e agjencive federale, sekuestruan cisternën venezueliane Skipper.
Edhe pse Uashingtoni këmbëngul se operacioni “Southern Spear” synon ekskluzivisht luftën kundër narkotrafikut të lidhur me pushtetin në Karakas, prania gjithnjë e më e madhe e avionëve luftarakë, anijeve luftarake, marinsave dhe platformave strategjike ngre pikëpyetjen nëse bëhet fjalë për paralajmërimin e një operacioni më të gjerë ushtarak, qoftë edhe në formën e presionit apo demonstrimit të forcës.
Për momentin, autoritetet amerikane hedhin poshtë mundësinë e veprimeve ofensive, por dinamika e zhvillimeve në terren vazhdon të ushqejë spekulimet për një zgjerim të mundshëm të misionit dhe për hyrjen e Karaibeve në periudhën e tensioneve më të mëdha të dy dekadave të fundit.
