Huda Abu al-Naja, një vajzë 12-vjeçare nga Gaza që për muaj të tërë kishte vuajtur nga kequshqyerja ekstreme për shkak të bllokadës izraelite, ka ndërruar jetë në spitalin Nasser në qytetin Khan Younis, raportoi The Times of Israel, duke iu referuar burimeve të gazetës Haaretz.
Sipas raportit, Huda vdiq nga një infeksion i zakonshëm, por sistemi i saj imunitar, i dobësuar rëndë nga mungesa e ushqimit, nuk ishte më në gjendje të luftonte sëmundjet.
Në korrik, kur një ekip i Sky News vizitoi spitalin, mjekët kishin treguar se vajza kishte humbur gjysmën e peshës trupore që nga marsi. Nëna e saj kishte thënë se e vetmja gjë që kërkonte vajza ishte pak fruta të freskëta, perime, peshk dhe mish, por se në Gaza “nuk kishte pothuajse asgjë për të ngrënë” pasi Izraeli kishte mbyllur kalimet kufitare dhe kishte vendosur bllokadën totale.
Në repartin ku ndodhej Huda, fëmijët marrin vetëm dekstrozë — një përzierje uji e sheqeri pa vlerë ushqyese, thonë mjekët.
Gaza në prag të urisë totale
Sipas agjencive të OKB-së dhe sistemit IPC për klasifikimin e sigurisë ushqimore, kufizimi i vazhdueshëm i ndihmave ushqimore ka shkaktuar uri të përhapur në qytetin e Gazës, me rrezik masiv urie në pjesët e tjera të territorit.
Të dhënat e autoriteteve izraelite tregojnë se sasia e ushqimit që lejohej të hynte shpesh ishte nën minimumin jetik të përcaktuar nga agjencitë ndërkombëtare.
Në korrik, Huda kishte thënë me vetëdije të trishtë:
“Lufta më ka ndryshuar. Kequshqyerja më ka zverdhur flokët. Nuk kam proteina. Dua të largohem për kurim. Jam fëmijë. Dua të luaj si ju.”
Pavarësisht përpjekjeve të organizatave ndërkombëtare që për muaj me radhë kishin kërkuar evakuimin e saj për trajtim jashtë Gazës, kërkesa nuk u miratua kurrë.
Bilanci i rëndë humanitar
Sipas Ministrisë së Shëndetësisë në Gaza, deri më tani 461 persona kanë vdekur nga uria, përfshirë 157 fëmijë.
Si pjesë e planit të paqes me 20 pika të Donald Trumpit, Izraeli ka pranuar të rihapë pesë pika kufitare për të lehtësuar hyrjen e ndihmave.
Sipas agjencisë izraelite COGAT, nga e diela pritet të hyjnë rreth 600 kamionë ndihmash në ditë, ndërsa Egjipti ka njoftuar dërgimin e 400 kamionëve të tjerë përmes kalimit Rafah.
Në zonën e Khan Younis, afër spitalit ku u shua Huda, qindra njerëz janë parë duke pritur kamionët e ndihmave, një pamje që për shumë palestinezë përfaqëson një shpresë të vonuar — por jo të mjaftueshme — pas dy vitesh urie dhe dëshpërimi.
