Shërbimi i Sigurisë së Ukrainës (SSU) ka prezantuar një gjeneratë të re të platformave detare pa pilot “Sea Baby”, të cilat kanë kaluar me sukses testet gjatë misioneve në Detin e Zi dhe janë të afta të përshkojnë mbi 1.500 kilometra.
Sipas njoftimit të SSU-së, këta dronë janë përdorur në disa misione të suksesshme, përfshirë sulmin e tretë ndaj Urës së Krimesë më 3 qershor 2025.
“Dronët tanë kanë ndryshuar ekuilibrin e forcave në Detin e Zi dhe kanë dëshmuar efektivitetin e tyre. Gjenerata e re e Sea Baby është edhe më efikase. Prandaj, puna për pastrimin e Detit të Zi nga flota ruse do të vazhdojë. Armiku do të ndiejë fuqinë e plotë të zhvillimit tonë teknologjik,” deklaroi gjeneral-koloneli Vasyl Maliuk, kreu i SSU-së.
Gjeneral-brigade Ivan “Lovci” Lukaševiç shtoi se gjatë sulmeve të këtij viti dronët detarë kanë transportuar eksplozivë deri te mbajtëset strukturore të Urës së Krimesë.
SSU bëri të ditur gjithashtu se modifikimet e reja të dronëve Sea Baby janë ndërtuar me fondet e mbledhura nga qytetarët ukrainas përmes platformës për mbledhje donacionesh UNITED24.
Një nga drejtuesit e kundërzbulimit ushtarak të SSU-së, përgjegjës për Drejtoria e 13-të për operacione kundër-diversioniste “Hunter”, tha se dronët e përmirësuar janë në gjendje të udhëtojnë mbi 1.500 kilometra, të mbajnë deri në 2.000 kilogramë ngarkesë, si dhe janë pajisur me motorë të fuqizuar dhe një sistem modern navigimi.
