Qeveria turke deklaroi sot se Ankara ka luajtur rol vendimtar në pengimin e pjesëmarrjes së kryeministrit izraelit Benjamin Netanyahu në samitin për Gazën, i cili po zhvillohet në Sharm el-Sheikh të Egjiptit.
“Me iniciativën e presidentit Recep Tayyip Erdoğan dhe falë përpjekjeve diplomatike të Turqisë, si dhe mbështetjes së disa krerëve të tjerë të shteteve dhe qeverive, Netanyahu nuk do të marrë pjesë në takimin në Egjipt,”
– deklaroi një përfaqësues i qeverisë turke për agjencinë gjermane dpa.
Përplasje në deklarata mes Ankarasë dhe Tel Avivit
Ndërsa Ankaraja e paraqiti vendimin si rezultat të drejtpërdrejtë të presionit diplomatik turk, Izraeli e interpretoi ndryshe situatën.
Zyra e presidentit egjiptian njoftoi sot në mesditë se Netanyahu do të vinte në samit, por zyra e kryeministrit izraelit e mohoi këtë pak orë më vonë, duke thënë se:
“Kryeministri Netanyahu e falënderon presidentin Donald Trump për ftesën në Egjipt, por nuk mund të udhëtojë për shkak të festës hebraike Simchat Torah.”
Samiti i paqes në Sharm el-Sheikh
Presidenti Donald Trump mbërriti sot në Sharm el-Sheikh, ku do të drejtojë samitin ndërkombëtar për Gazën, me pjesëmarrjen e të paktën 20 liderëve botërorë.
Në samit pritet të diskutohen zbatimi i armëpushimit, rindërtimi i Gazës dhe krijimi i strukturave të përkohshme civile që do të mbikëqyrin tranzicionin pas luftës.
Burime diplomatike në Ankara kanë theksuar se Turqia e kishte kundërshtuar fuqishëm praninë e Netanyahut, duke e konsideruar “të papranueshme që një udhëheqës nën akuzë për krime lufte të ulet në tryezën e paqes për Gazën.”
