Qindra mijëra njerëz marshuan të dielën nëpër rrugët e Amsterdamit, duke i bërë thirrje qeverisë holandeze të marrë një qëndrim më të ashpër kundër luftës gjenocidale të Izraelit në Rripin e Gazës.
Organizatorët vlerësojnë se rreth 250.000 persona iu bashkuan demonstratave – shifër që është konfirmuar edhe nga policia lokale. Shumica e pjesëmarrësve mbanin veshje të kuqe, si simbolikë e një “vije të kuqe” kundër rrethimit izraelit të Gazës.
“Marshi i vijës së kuqe” pason një protestë të ngjashme masive në Hagë në muajin maj dhe ishte planifikuar javë më parë, përpara se presidenti amerikan Donald Trump të shpallte planin e tij për përfundimin e luftës. Organizata PAX Netherlands, që udhëhoqi marshin, deklaroi se shpreson për paqe në Gaza, por se plani i Trumpit nuk ka ndryshuar vendosmërinë e tyre.
Pavarësisht shiut, protestues të të gjitha moshave marshuan gjashtë kilometra nëpër kryeqytetin holandez, duke valëvitur flamuj palestinezë, duke brohoritur “E lirë, e lirë Palestina” dhe duke mbajtur pankarta ku shkruhej “Izrael, turp të qoftë!” dhe “Nuk jemi të lirë derisa Gaza të jetë e lirë”.
“Jemi këtu për të dënuar gjithçka që po ndodh në Gaza. Ndjej se kjo është gjëja më e vogël që mund të bëjmë duke parë tmerrin atje,” tha Emilia Rivero, 27 vjeç, e ardhur nga qyteti Utrecht.
Organizatorët akuzuan qeverinë holandeze se nuk po bën mjaftueshëm për të ndaluar Izraelin nga kryerja e krimeve të luftës dhe kërkuan veprim të menjëhershëm nga politikanët, vetëm tri javë para zgjedhjeve të përgjithshme të 29 tetorit.
“Shpresojmë që shumë shpejt të ketë një armëpushim të vërtetë dhe që njerëzit të jenë të mbrojtur, të marrin ndihmë humanitare dhe të jetojnë në siguri. Por jemi gjithashtu të shqetësuar për angazhimin afatgjatë të Izraelit për të ndaluar gjenocidin,” – deklaroi për Reuters drejtori i PAX Netherlands, Rolien Sasse.
Që nga protesta e muajit maj, qeveria holandeze ka filluar të ndryshojë gradualisht qëndrimin ndaj Izraelit. Në korrik, ajo vendosi ndalime udhëtimi për dy ministra izraelitë të ekstremit të djathtë, duke i akuzuar për nxitje dhune kundër palestinezëve dhe për thirrje për “spastrimin etnik” të Gazës.
Muajin e kaluar, qeveria njoftoi se planifikon të ndalojë importin e mallrave nga vendbanimet hebraike në territoret palestineze të okupuara nga Izraeli dhe mbështeti planet e Komisionit Evropian për pezullimin e disa marrëveshjeve tregtare me Izraelin.
Ndërkohë, Geert Wilders, lideri populist anti-mysliman dhe kreu i partisë më të madhe në parlament, ka shprehur vazhdimisht mbështetje të palëkundur për Izraelin.
