Kryediplomati spanjoll, Albares tha se ata në bord të flotiljes “nuk përfaqësojnë dhe nuk përfaqësonin asnjë kërcënim për Izraelin apo askënd tjetër”, pasi “objektivi i tyre i vetëm ishte humanitar”
Ministri spanjoll i Punëve të Jashtme, Jose Manuel Albares ka njoftuar se ka thirrur të ngarkuarën me punë të Izraelit në Spanjë pas sulmit ndaj flotiljes së ndihmës humanitare “Sumud” që ishte nisur për në Gaza, transmeton Anadolu.
Duke folur në transmetuesin spanjoll RTVE, Albares tha se e ngarkuara me punë e Izraelit në Spanjë, Dana Erlich, është thirrur për të përcjellë dënimin e qeverisë spanjolle për atë që ndodhi.
Ai theksoi se “çështja urgjente është se integriteti fizik dhe të drejtat e qytetarëve spanjollë në bord të flotiljes të respektohen”, pasi ata u “ndaluan” nga Izraeli.
Albares tha gjithashtu se ata në bord të flotiljes “nuk përfaqësojnë dhe nuk përfaqësonin asnjë kërcënim për Izraelin apo askënd tjetër”, pasi “objektivi i tyre i vetëm ishte humanitar”, duke theksuar se ata nuk duhet të akuzohen për “absolutisht asgjë”.
Më tej, ai tha se në bord ndodheshin 65 qytetarë spanjollë dhe se ende nuk kanë të dhëna specifike për numrin e të ndaluarve.
Organizatorët thanë se forcat detare izraelite sulmuan flotën ndërkombëtare të ndihmës që ishte nisur për në Rripin e Gazës së rrethuar dhe ndaluan 317 aktivistë në bord.
Aktivistët në anijet e sulmuara nga Izraeli ishin të kombësive të ndryshme, duke përfshirë spanjollë, italianë, brazilianë, turq, grekë, amerikanë, gjermanë, suedezë, britanikë, francezë dhe shumë të tjerë.
Ministria e Punëve të Jashtme e Izraelit platformës sociale të kompanisë amerikane X tha se aktivistët e ndaluar janë duke shkuar drejt portit Ashdod të Izraelit, nga i cili do të deportohen në Evropë.
Gjurmuesi zyrtar i flotiljes tregoi se 21 anije janë sulmuar nga forcat izraelite, ndërsa 23 të tjera janë në rrugë për në Gaza.
