Presidenti i Argjentinës, Javier Milei, u ngjit në skenë të hënën në mbrëmje në Buenos Aires gjatë një aktiviteti për promovimin e librit të tij, i cili u shndërrua në një koncert rok. Sipas CNN, aktiviteti mori shpejt atmosferën e një shfaqjeje muzikore, ndërsa mbështetësit e Mileit u entuziazmuan, por opozita reagoi ashpër duke e akuzuar atë se “është shkëputur nga realiteti ekonomik i vendit”.
Para një audience prej rreth 15.000 personash, ku ndodheshin aleatë politikë dhe simpatizantë të rinj, Milei zëvendësoi motor-sharrën e tij karakteristike me mikrofonin, për të motivuar votuesit e tij para zgjedhjeve parlamentare të 26 tetorit. Por koncerti u zhvillua në sfondin e një krize politike të shkaktuar nga dorëheqja e një prej figurave më të njohura të partisë në pushtet.
José Luis Espert, kandidat për deputet në provincën e Buenos Airesit, dha dorëheqjen të dielën pas akuzave se kishte marrë para nga trafikantët e drogës — diçka që ai e mohoi kategorikisht. Gjatë koncertit, Milei nuk e përmendi drejtpërdrejt çështjen, por përqafoi Diego Santillin, i cili e zëvendësoi Espertin në fushatë.
Aktiviteti, i cili shënoi publikimin e librit të tij të ri “Ndërtimi i mrekullisë” (“La Construcción del Milagro”), u transmetua drejtpërdrejt nga televizioni shtetëror dhe u shndërrua në një spektakël muzikor ku anëtarët e koalicionit qeverisës interpretuan nëntë këngë rok.
Liderët e opozitës e akuzuan Milein se “është shkëputur plotësisht nga realiteti ekonomik” në një vend që po përballet me inflacion të lartë, paqëndrueshmëri të monedhës dhe mungesë të rezervave valutore për shlyerjen e borxheve të jashtme.
Guvernatori i Buenos Airesit, Axel Kicillof, deklaroi: “Ndoshta mund t’i bënte këto gjëra kur ishte kandidat, por tani situata është shumë serioze. Duhet të marrë përgjegjësinë dhe të merret me problemet reale ekonomike.”
Pas një humbjeje zgjedhore në Buenos Aires në shtator, Milei iu drejtua mbështetësve të tij duke thënë: “Ata fituan një raund, por as luftën dhe as betejën.”
Në fund të mbrëmjes, ai hoqi xhaketën e lëkurës dhe veshi kostumin me kravatë, duke premtuar reforma të gjera ekonomike pas 10 dhjetorit — me kusht që partia e tij të zgjerojë ndikimin në Kongres.
Partia në pushtet La Libertad Avanza shpreson që në zgjedhjet e 26 tetorit të sigurojë më shumë vende në parlament, në mënyrë që të zbatojë planet e saj ekonomike pa pasur nevojë për mbështetjen e aleatëve të koalicionit.
