“Ne ishim në ambasadë me delegacionin tim, vetëm disa qindra metra larg vendit ku goditën raketat. Kjo duhet të ndalet. Armëpushimi midis SHBA-së, Izraelit dhe Iranit duhet të përfshijë Libanin”, tha ai
Ministri i Punëve të Jashtme, Maxime Prevot, ka bërë thirrje që armëpushimi i ndërmjetësuar së fundmi midis SHBA-së dhe Iranit të zgjerohet për të përfshirë Libanin, pasi sulmet vdekjeprurëse izraelite vazhduan në kryeqytetin libanez Bejrut, transmeton Anadolu.
Prevot në rrjetin social amerikan X tha se po viziton Bejrutin për të riafirmuar mbështetjen e Belgjikës për autoritetet libaneze, duke dënuar sulmin masiv izraelit që goditi vetëm qindra metra larg ambasadës belge.
“Ne ishim në ambasadë me delegacionin tim, vetëm disa qindra metra larg vendit ku goditën raketat. Kjo duhet të ndalet. Armëpushimi midis SHBA-së, Izraelit dhe Iranit duhet të përfshijë Libanin”, tha ai.
Prevot gjithashtu përshëndeti një ofertë nga presidenti libanez, Michel Aoun, për t’i hapur negociatat zyrtare me Izraelin drejt një armëpushimi, duke theksuar se mungesa e paralajmërimit para sulmeve vuri në pah nevojën urgjente për të zgjeruar armëpushimin.
Derisa vazhdon të godasë Iranin, Izraeli ka kryer sulme ajrore dhe një ofensivë tokësore në Libanin jugor që nga fillimi i marsit, pavarësisht një armëpushimi që hyri në fuqi në nëntor të vitit 2024.
Autoritetet libaneze thanë se të paktën 1.530 persona janë vrarë dhe 4.812 të tjerë janë plagosur në sulmet izraelite.
Pas ndërmjetësimit nga Pakistani, presidenti i SHBA-së, Donald Trump, dje njoftoi një armëpushim dyjavor me Iranin, duke theksuar se Teherani paraqiti një propozim “të realizueshëm” prej 10 pikash për negociata.
Njoftimi erdhi më pak se dy orë para skadimit të një afati që Trump kishte zgjatur vazhdimisht për Iranin për të rihapur Ngushticën e Hormuzit dhe për të pranuar një marrëveshje ose për t’u përballur me shkatërrim të gjerë.
Tensionet rajonale u përshkallëzuan pas sulmeve të SHBA-së dhe Izraelit kundër Iranit më 28 shkurt, duke shkaktuar sulme hakmarrëse nga Teherani që synonin Izraelin dhe vendet që strehonin asete ushtarake amerikane.
