Administrata e presidentit amerikan Donald Trump ka miratuar një plan për sulme ndaj instalimeve ushtarake brenda Venezuelës, dhe sipas burimeve për Miami Herald, operacioni mund të nisë në çdo moment.
Objektivi: rrjetet ushtarake të lidhura me trafikimin e drogës
Sipas Wall Street Journal, që gjithashtu raportoi për këtë zhvillim, sulmet do të kenë për qëllim shkatërrimin e bazave ushtarake që, sipas Shteteve të Bashkuara, përdoren nga një organizatë për trafikim droge e drejtuar nga presidenti venezuelian Nicolás Maduro dhe njerëzit e tij më të afërt.
Burimet thanë se objektivat mund të goditen nga ajri brenda pak ditësh, madje edhe orësh, me synimin për të “shkëputur kokën” e strukturës së kartelit. Zyrtarët amerikanë besojnë se ky rrjet eksporton rreth 500 ton kokainë çdo vit drejt Evropës dhe SHBA-së.
Një prej burimeve u shpreh se “koha e Maduros po mbaron”, duke shtuar se “ai mund të gjendet së shpejti i bllokuar dhe pa mundësi për t’u arratisur nga vendi, ndërsa disa gjeneralë janë tashmë të gatshëm ta dorëzojnë”.
SHBA shpall shpërblim rekord për kapjen e Maduros
Uashingtoni ka dyfishuar shpërblimin për informacionet që çojnë në arrestimin e Maduros në 50 milionë dollarë – shuma më e madhe e ofruar ndonjëherë – ndërsa ofron 25 milionë dollarë për disa nga bashkëpunëtorët e tij kryesorë, përfshirë ministrin e brendshëm Diosdado Cabello, i akuzuar për drejtimin e operacioneve të kartelit.
Një tjetër figurë e lartë e regjimit që përballet me akuza të ngjashme është ministri i mbrojtjes Vladimir Padrino López.
Rritje e pranisë ushtarake amerikane në Karaibe
Që nga gushti, SHBA ka vendosur një prani të gjerë ushtarake në Karaibet jugore, afër brigjeve të Venezuelës. Fillimisht janë përfshirë tre anije shkatërruese dhe një grup amfib prej rreth 4500 ushtarësh.
Operacioni përfshin patrulla detare me avionë zbulues P-8 dhe fluturime të gjata vëzhgimi për identifikimin e rrugëve të kontrabandës. Në shtator, praninë e përforcuan 10 avionë luftarakë F-35B nga baza ajrore Ceiba në Porto Riko dhe dronë të armatosur MQ-9 Reaper në ishullin Rafael Hernández.
Zyrtarët amerikanë thanë se këto njësi janë të afta të kryejnë goditje precize ndaj laboratorëve, pistave të fshehta dhe mjeteve të lidhura me trafikimin e drogës.
Një grup aeroplanmbajtës në drejtim të Venezuelës
Më 24 tetor, sekretari amerikan i mbrojtjes Pete Hegseth urdhëroi që aeroplanmbajtësja USS Gerald R. Ford dhe grupi i saj goditës – përfshirë USS Normandy, USS Thomas Hudner, USS Ramage, USS Carney dhe USS Roosevelt – të hyjnë në Detin e Karaibeve, duke sinjalizuar mundësinë e një operacioni të afërt kundër regjimit të Maduros.
