Kievi mohon përfshirjen dhe e quan akuzën një pretendim të “flamurit të rremë”
Rusia pretendon se Ukraina mund të jetë e përfshirë në sulmin ndaj gazsjellësit “TurkStream”, transmeton Anadolu.
Duke komentuar në një konferencë për media në Moskë mbi raportet e autoriteteve serbe që thanë se eksplozivë u gjetën pranë “TurkStream” në territorin e tyre, zëdhënësi i Kremlinit, Dmitry Peskov tha se nuk ka prova konkrete se kush mund të jetë pas tentativave për sulm, por mund të supozohen gjurmë ndërhyrjeje nga regjimi i Kievit.
“Më parë, siç e dimë, regjimi i Kievit ishte i përfshirë drejtpërdrejt në akte të tilla sabotimi kundër infrastrukturës kritike të energjisë. Me një shkallë të lartë probabiliteti mund të supozohet se edhe këtë herë do të zbulohen disa gjurmë ndërhyrjeje nga regjimi i Kievit”, tha Peskov.
Ai shtoi se Moska shpreson që gjatë vizitës së tij në Turqi, presidentit ukrainas Volodymyr Zelenskyy iu tha se veprimet agresive kundër infrastrukturës së gazsjellësve “TurkStream” dhe “Blue Stream” janë të papranueshme.
Ukraina të dielën kategorikisht hodhi poshtë përpjekjet për të lidhur Kievin me eksplozivët e gjetur pranë gazsjellësit “TurkStream” Serbi-Hungari.
“Ukraina nuk ka të bëjë fare me këtë”, tha zëdhënësi i Ministrisë së Jashtme, Heorhii Tykhyi.
“Me shumë mundësi (ishte) një operacion rus me flamur të rremë si pjesë e ndërhyrjes së rëndë të Moskës në zgjedhjet hungareze”, shkroi ai në platformën amerikane të mediave sociale X, duke iu referuar zgjedhjeve të përgjithshme të Hungarisë të caktuara për të dielën e ardhshme, më 12 prill.
“Rusia po merr masa për të ofruar sigurinë e infrastrukturës së ‘TurkStream’ dhe ‘Blue Stream’. Shpresojmë që Hungaria dhe Serbia do të marrin masa për të minimizuar kërcënimin ndaj këtyre tubacioneve të gazit”, tha Peskov.
Rusia dhe Ukraina vazhdojnë të kontaktojnë SHBA-në përmes kanaleve të tyre përkatëse dhe të shkëmbejnë informacione.
