Raundi i ardhshëm i bisedimeve ndërmjet Rusisë dhe Ukrainës pritet të mbahet në zyrën e administratës së presidentit turk Recep Tayyip Erdoğan në Stamboll, raportoi një burim i informuar për agjencinë ruse RIA Novosti.
“Ka gjasa që raundi të mbahet sërish në zyrën e punës në Dolmabahçe,” tha burimi.
Kjo zyrë ndodhet pranë pallatit me të njëjtin emër, në një nga lagjet historike të Stambollit.
Raundi i ri i negociatave do të zhvillohet të hënën, më 2 qershor, dhe Moska do të paraqesë një memorandum mbi marrëveshjen e ardhshme të paqes.
Përbërja e delegacionit rus do të jetë e njëjtë si në raundin e mëparshëm: ndihmësi i presidentit Vladimir Medinski, zëvendësministri i jashtëm Mihail Galuzin, kreu i inteligjencës ushtarake Igor Kostjukov dhe zëvendësministri i mbrojtjes Aleksandar Fomin.
Takimi i parë pas tri vitesh mes përfaqësuesve të Moskës dhe Kievit u mbajt më 16 maj. Palët u pajtuan të paraqesin vizionin e tyre për një armëpushim të mundshëm dhe të organizojnë një shkëmbim të madh të të burgosurve në raportin 1000 për 1000, i cili u zhvillua nga 23 deri më 25 maj.
Gjatë bisedimeve, Ukraina kërkoi takim të drejtpërdrejtë mes krerëve të shteteve, dhe Rusia e mori këtë kërkesë në konsideratë.
Ministri i Jashtëm i Turqisë, Hakan Fidan, i cili pas vizitës në Moskë zhvilloi një mision diplomatik edhe në Kiev, deklaroi se nëse arrihet një rezultat pozitiv në negociatat që do të vazhdojnë më 2 qershor në Stamboll, atëherë mund të mblidhen liderët e SHBA-së, Rusisë dhe Ukrainës për të kurorëzuar procesin nën drejtimin e presidentit Erdoğan.
