Gjatë takimit të sotëm midis presidentit të Azerbajxhanit, Ilham Alijev, dhe presidentit të Rusisë, Vladimir Putin, pala ruse pranoi se rrëzimi i avionit pasagjerësh nga Azerbajxhani ndodhi për shkak të një gabimi të mbrojtjes ajrore ruse.
Vladimir Putin pranoi se avioni Embraer 190 i kompanisë ajrore AZAL, i cili u rrëzua në dhjetor të vitit 2024, është goditur nga sistemi rus i mbrojtjes ajrore.
Në bord ndodheshin 67 persona — pesë anëtarë të ekuipazhit dhe 62 pasagjerë — prej të cilëve humbën jetën 38, ndërsa 29 mbijetuan.
Një ditë pas aksidentit, Reuters dhe Euronews raportuan se avioni ishte goditur nga raketat e mbrojtjes ajrore ruse, dhe se ekuipazhit nuk iu lejua të ulej në asnjë aeroport rus, por iu urdhërua të fluturonte drejt Kazakistanit.
Putin për herë të parë dha versionin zyrtar të palës ruse. Sipas tij, sistemi rus i mbrojtjes ajrore po ndiqte dronë ukrainas dhe më pas lëshoi dy raketa që “shpërthyen disa metra larg avionit”.
“Është detyrimi ynë të japim një vlerësim objektiv të gjithçkaje që ndodhi dhe të tregojmë shkakun e vërtetë. Sigurisht, pala ruse do të ndërmarrë të gjitha masat e nevojshme në raste të tilla tragjike, përfshirë edhe kompensimin,” tha Putin.
Tre ditë pas aksidentit, më 28 dhjetor, Kremlini njoftoi se Putin i kishte kërkuar falje Alijevit për “incidentin tragjik” në hapësirën ajrore ruse, por Moska nuk kishte marrë përgjegjësinë deri më tani.
