Komanda e përbashkët ushtarake e Gardës Revolucionare Islamike (IRGC) ka lëshuar një deklaratë ku pretendon se kontrolli mbi Ngushticën e Hormuzit është “rikthyer në gjendjen e mëparshme”, pasi amerikanët kanë thënë se veprimi i tyre për zhbllokimin e ngushticës nuk do të nënkuptojë edhe përfundimin e bllokadës amerikane ndaj porteve iraniane. Në deklaratën e transmetuar nga televizioni shtetëror iranian IRIB, komanda e IRGC-së thekson se Shtetet e Bashkuara “kanë vazhduar me akte piraterie dhe grabitjeje detare nën petkun e të ashtuquajturës bllokadë”.
“Për këtë arsye, kontrolli i Ngushticës së Hormuzit është rikthyer në gjendjen e mëparshme dhe kjo rrugë strategjike detare tani është nën menaxhim dhe kontroll të rreptë nga forcat e armatosura”, thuhet në deklaratë.
Shtohet se, derisa Shtetet e Bashkuara të vendosin liri të plotë të lundrimit për anijet që udhëtojnë nga Irani drejt destinacioneve të tyre dhe anasjelltas, statusi i Ngushticës së Hormuzit do të mbetet nën kontroll të rreptë dhe në gjendjen e mëparshme.
Ky njoftim vjen një mëngjes pasi presidenti amerikan Donald Trump deklaroi se bllokada amerikane “do të mbetet në fuqi me kapacitet të plotë” derisa Teherani të arrijë një marrëveshje me SHBA-në, përfshirë edhe atë mbi programin e tij bërthamor.
Kujtojmë se dje u raportua se Irani e kishte zhbllokuar Ngushticën e Hormuzit pas arritjes së një marrëveshjeje për armëpushim 10-ditor në Liban. Megjithatë, kjo gjendje zgjati vetëm disa orë.
