Zëdhënësja e Ministrisë së Jashtme, Maria Zakharova, tha se Moska e sheh hartimin e hapave të përbashkët drejt zgjidhjes së çështjes ukrainase si qëllim të kontakteve me SHBA-në
Duke komentuar deklaratën e administratës së Donald Trumpit se aktualisht nuk ka “plane” për një takim mes presidentit të SHBA-së dhe atij Rusisë, Moska tha sot se është e hapur për të vazhduar kontaktet me Washingtonin, raporton Anadolu.
Gjatë një konference për shtyp në Moskë, zëdhënësja e Ministrisë së Punëve të Jashtme, Maria Zakharova, tha se qëllimi i kontakteve ruso-amerikane është saktësimi i mëtejshëm i parametrave të dialogut të tyre, si për aspektet e ndryshme të marrëdhënieve bilaterale, ashtu edhe për hapat e përbashkët drejt një zgjidhjeje për Ukrainën.
“Ne veprojmë mbi bazën e supozimit që Washingtoni do të vazhdojë të ndajë konsideratat dhe motivet e tij lidhur me masat e marra, përfshirë edhe ato të publikuara”, tha ajo.
Pozicioni i Rusisë mbi konfliktin ukrainas mbetet i pandryshuar, shtoi ajo, duke përfshirë sigurimin e neutralitetit të besueshëm, mosaleancës, statusin jobërthamor të Ukrainës, demilitarizimin dhe “denazifikimin” e saj, zhvillimin e garancive të forta për të drejtat dhe liritë e popullsisë rusishtfolëse, si dhe aktivitetet e papenguara të Kishës Ortodokse Ukrainase.
“Kjo shërben si pikënisje në dialogun tonë me Shtetet e Bashkuara dhe vendet e tjera të interesuara që synojnë të japin kontribut konstruktiv për zgjidhjen”, theksoi ajo.
Zakharova tha se pala ruse nuk sheh pengesa të mëdha për të vazhduar procesin e nisur nga presidenti rus dhe ai amerikan, i cili synon përafrimin e kornizave politike për zgjidhjen e krizës ukrainase dhe mbushjen e tyre me rezultate konkrete.
“Po, kjo është një punë e vështirë dhe e mundimshme, por duhet të bëhet nëpërmjet përpjekjeve dhe instrumenteve diplomatike, dhe jo nëpërmjet rrjedhjes së informacionit ose provokimeve”, tha ajo.
