Naftovodi Družba të mërkurën rifilloi pompimin e naftës ruse përmes Ukrainës drejt Hungarisë dhe Sllovakia, duke bërë që Budapesti të tërhiqte veton ndaj një kredie prej 90 miliardë eurosh të Bashkimit Evropian për Kievin.
Pas një ndërprerjeje disa mujore, nafta ruse po rrjedh sërish në segmentin ukrainas të këtij naftovodi, njoftuan zyrtarët. Kjo i dha fund bllokadës së furnizimeve për Hungarinë dhe Sllovakinë, e cila kishte ndodhur pasi një dron rus kishte dëmtuar tubacionin në Ukrainën perëndimore dhe kishte ndalur rrjedhën.
Grupi hungarez i naftës MOL Group njoftoi se Ukraina i ka informuar për rifillimin e furnizimeve me naftë bruto ruse përmes sistemit të naftovodit. “MOL pret që dërgesat e para të mbërrijnë në Hungari dhe Sllovaki më së voni deri nesër”, thuhet në deklaratë.
Presidenti ukrainas Volodymyr Zelenskyy tha se vendimi i BE-së është “një sinjal i duhur në rrethanat aktuale”. Ai theksoi se nxitjet për përfundimin e luftës së Rusisë kundër Ukrainës “mund të shfaqen vetëm kur mbështetja për Ukrainën dhe presioni ndaj Rusisë janë të mjaftueshme”.
Bashkimi Evropian vitin e kaluar u pajtua në parim për një kredi për të ruajtur likuiditetin e Ukrainës gjatë viteve 2026 dhe 2027, por kjo ishte bllokuar nga kryeministri hungarez Orbán dhe qeveria sllovake, të cilët akuzonin Ukrainën për vonesa në riparimin e naftovodit – akuza që Kievi i ka mohuar.
Hungaria dhe Sllovakia varen shumë nga importet e naftës ruse, ndërsa Orbán vazhdimisht ka shprehur mbështetje për Rusinë.
