Në koncertin e organizatës United Hatzalah, të mbajtur këtë javë në Jeruzalem, ndodhi një skenë e çuditshme kur dy ambasadorë amerikanë në Izrael – ish-ambasadori David Friedman dhe aktuali Mike Huckabee – përpunuan këngën “Sweet Home Alabama” për të promovuar idenë e “Izraelit të Madh”.
Friedman, i cili nga viti 2017 deri në vitin 2021 ka qenë ambasador i SHBA-së në Izrael, së bashku me Huckabee-n dhe komedianin Elon Gold, e interpretuan versionin e ri të quajtur “Sweet Home Yerushalayim”, që në hebraisht do të thotë Jeruzalem.
Në këtë paraqitje, ata jo vetëm që ndryshuan titullin, por edhe tekstin e këngës, duke përfshirë disa pjesë të diskutueshme në të cilat promovohet ideja e “Izraelit të Madh”, që do të përfshinte edhe pjesë të territorit palestinez.
Në tekstin e ndryshuar thuhej:
“Francezët dhe miqtë mendojnë se kjo nuk është tokë hebreje, Kombet e Bashkuara na quajnë hajdutë, por Donald Trump thotë se gjithçka është Izrael.”
Ata iu referuan edhe faktit se gjatë mandatit të parë të Donald Trump, SHBA hapi ambasadën në Jeruzalem, duke theksuar se “është qyteti ku hebrenjtë kanë qenë për 3.000 vjet”.
Koncerti u organizua nga fondacioni United Hatzalah, i cili bashkon rreth 7.000 punëtorë humanitarë që veprojnë në territorin e Izraelit.
