Lideri de facto i Arabisë Saudite, princi i kurorës Mohammed bin Salman, i ka bërë thirrje presidentit amerikan Donald Trump që të vazhdojë luftën kundër Iranit, raportoi The New York Times, duke iu referuar burimeve të njohura me informacionet e zyrtarëve amerikanë.
Sipas raportit, bin Salman ka zhvilluar disa biseda me Trump gjatë javës së kaluar, duke e nxitur atë që të vazhdojë luftimet derisa pushteti në Iran të rrëzohet. Princi saudit e sheh Iranin si një kërcënim afatgjatë që do të ekzistojë për sa kohë ekziston Republika Islamike. Ai gjithashtu beson se Irani mund të vazhdojë të shënjestrojë Arabinë Saudite dhe të rrezikojë trafikun detar edhe pas përfundimit të luftës.
Sipas Times, bin Salman frikësohet edhe nga një skenar i dështimit të shtetit iranian, ku fraksione ushtarake do të vazhdonin sulmet ndaj mbretërisë.
Publikisht, Rijadi – i cili ka qenë objekt i shumë sulmeve me dronë dhe raketa nga Irani – deklaron se dëshiron një zgjidhje diplomatike.
Megjithatë, sipas burimeve, MBS dëshiron goditje amerikane ndaj infrastrukturës energjetike të Iranit për të dobësuar regjimin. Ai madje ka mbështetur edhe vendosjen e forcave tokësore amerikane për të marrë kontrollin mbi objektet energjetike dhe për të rrëzuar regjimin, thuhet në raport.
Ai gjithashtu i ka thënë Trumpit se rritjet e çmimeve të naftës do të jenë vetëm të përkohshme.
