Gjyqtari i Gjykatës Penale Ndërkombëtare, Nicolas Guillou, i cili nxori urdhër-arrest ndaj kryeministrit izraelit për krime lufte në Gaza, deklaroi se pas sanksioneve të SHBA-së jeta e tij e përditshme është kufizuar seriozisht.
Izraeli, krahas luftës kundër Iranit të nisur me arsyetimin e prodhimit të armëve bërthamore dhe të mbështetur nga SHBA, vazhdon edhe bllokadën në Gaza.
Të gjithë personat dhe institucionet që kanë ngritur padi kundër Izraelit për krime lufte në Gaza janë bërë objekt i sulmeve nga lobet amerikane dhe izraelite.
Sanksione amerikane ndaj gjyqtarit të GJPN-së
Gjyqtari francez Nicolas Guillou, pjesë e Gjykatës Penale Ndërkombëtare, tha se pas vendimit të 21 nëntorit 2024 për urdhër-arrest ndaj kryeministrit izraelit Benjamin Netanyahu dhe ish-ministrit të mbrojtjes Yoav Gallant për krime lufte në Gaza, ai është futur në listën e sanksioneve nga SHBA.
Në një deklaratë për mediat franceze, Guillou tha se pasi SHBA e ka futur në të njëjtën listë të zezë me “terroristët dhe trafikantët e drogës”, jeta e tij është bërë shumë e vështirë.
“Kartat tona bankare nuk funksionojnë më”
Duke shpjeguar ndikimin e drejtpërdrejtë të sanksioneve në jetën e tij, Guillou theksoi se shumica e sistemeve të pagesave në Francë janë të lidhura me kompani amerikane:
“Kartat tona bankare nuk funksionojnë më. Kartat që përdorim në Francë janë të lidhura me sistemet Visa dhe Mastercard. Për këtë arsye, nuk mund të kryej më shumë pagesa.”
Ai shtoi se për shkak të sanksioneve nuk mund të përdorë as platformat online, duke përfshirë blerjet dhe rezervimet.
“ Nuk mund të porosis më nga Amazon dhe nuk mund të bëj rezervime përmes Airbnb. Provova të rezervoj hotel në Booking, por e kuptova që transaksioni do të bllokohej,” tha ai.
“Sikur të jetoj në epokën para digjitale”
Guillou deklaroi se kjo situatë e ka kthyer në një realitet sikur të jetonte në kohën para teknologjisë:
“Po përballem me vështirësi shumë serioze në jetën e përditshme. Ndihem sikur jam detyruar të jetoj 30 vite më parë, në një botë para digjitale.”
Ai theksoi se, pavarësisht se është gjyqtar, po trajtohet sikur të ishte një kriminel.
“Kjo rrezikon demokracinë”
Gjyqtari paralajmëroi se presioni mbi sistemin e drejtësisë përbën rrezik për rendin demokratik: “Nëse prokurorët kanë frikë të ngrenë padi, avokatët të mbrojnë, gjyqtarët të marrin vendime dhe politikanët të kryejnë detyrat e tyre, atëherë nuk ka më demokraci.”
Macron ndërhyri, por pa rezultat
Për heqjen e sanksioneve ndaj Guillou, njërit prej 6 gjyqtarëve dhe 3 prokurorëve të GJPN-së në listën e sanksioneve të Departamentit të Thesarit të SHBA-së, është angazhuar edhe presidenti francez Emmanuel Macron.
Megjithatë, pavarësisht përpjekjeve diplomatike, autoritetet amerikane nuk kanë dhënë përgjigje pozitive për heqjen e sanksioneve. Guillou theksoi se disa juristë i kanë thënë se heqja e këtyre sanksioneve është e vështirë pa përfunduar proceset politike në SHBA.
