Péter Szijjártó, ministri i Jashtëm i Hungarisë, për vite me radhë ka informuar rregullisht homologun e tij rus Sergej Lavrov për detajet e takimeve të Bashkimit Evropian, ka raportuar Washington Post.
Szijjártó është figurë kyçe në qeverinë proruse të Viktor Orbán në Budapest, e cila prej kohësh mbështet hapur interesat e Moskës brenda BE-së dhe NATO-s. Kjo përfshin edhe përpjekje të shpeshta për të bllokuar paketat e ndihmës për Ukrainën.
Hungaria aktualisht po përdor të drejtën e vetos për të bllokuar efektivisht një kredi jetike të Bashkimit Evropian për Kievin në vlerë prej 90 miliardë eurosh, ndërsa vetë kryeministri Orbán ka deklaruar se nuk do të lejojë kurrë anëtarësimin e Ukrainës në këtë bllok prej 27 shtetesh.
Sipas një zyrtari evropian të sigurisë (i paemërtuar), të cituar nga Washington Post, “për shkak të lidhjeve të forta të shefit hungarez të diplomacisë me Lavrovin, Moska në thelb ka qenë e pranishme në çdo takim të vetëm të BE-së”.
Gazeta shkruan se Szijjártó, i cili që nga fillimi i pushtimit rus në shkurt 2022 ka vizituar Moskën 16 herë zyrtarisht, ka zhvilluar rregullisht biseda telefonike gjatë pushimeve të takimeve në Bruksel. Qëllimi ishte t’i ofronte homologut rus “raporte në kohë reale për diskutimet dhe zgjidhjet e mundshme”.
Pasi ministri i Jashtëm polak Radosław Sikorski e përballi publikisht me këtë raport në rrjetin social X (ish-Twitter), ministri hungarez i hodhi poshtë të gjitha duke i quajtur “lajme të rreme”.
Szijjártó pretendon se bëhet fjalë për një përpjekje për ndikim të huaj ndaj votuesve hungarezë para zgjedhjeve parlamentare vendimtare që do të mbahen muajin e ardhshëm.
“Ju po thoni gënjeshtra për të mbështetur partinë (opozitare) Tisza që të formojë një qeveri kukull pro luftës në Hungari”, i tha ai ministrit polak, duke shtuar: “Kjo nuk do të ndodhë!”.
Ky skandal vjen në një kohë kur janë shfaqur edhe akuza se shërbimi rus i inteligjencës ka propozuar inskenimin e një atentati ndaj Orbánit, me qëllim rritjen e popullaritetit të tij para zgjedhjeve të 12 prillit.
Kryeministri hungarez, të cilin një zyrtar perëndimor e ka përshkruar si “një nga asetet më të mira të Rusisë”, po përballet me sfidën më serioze në 16 vitet e tij në pushtet. Rivali i tij kryesor, Péter Magyar, ka premtuar se do të ndryshojë kursin pro-Kremlinit të Budapestit nëse partia e tij Tisza vjen në pushtet. Edhe pse Tisza kryesonte në sondazhe në fillim të fushatës, sondazhet më të fundit tregojnë një garë të barabartë.
Rritja e fundit e Orbánit në sondazhe i atribuohet një fushate agresive, në të cilën Magyar paraqitet si “marionetë e Kievit” që do ta fusë Hungarinë në luftë me Rusinë. Ndërsa Magyar e hedh poshtë këtë si “propagandë qesharake”, partia e tij vazhdon të tregojë kujdes të madh në temat si anëtarësimi i mundshëm i Ukrainës në BE.
