Sipas raportimit të The New York Times, Venezuela i ka ofruar Shteteve të Bashkuara hapjen e tregut për kompanitë amerikane, kontrata të favorshme për eksportin e naftës, si dhe shkëputje të konsiderueshme nga marrëdhëniet ekonomike me Rusinë, Kinën dhe Iranin — por administrata e presidentit Donald Trump e ka refuzuar këtë ofertë.
Gazeta shkruan se në mënyrë sekrete janë mbajtur disa takime midis delegacioneve të dy vendeve, ku presidenti venezuelian Nicolás Maduro është përpjekur të shmangë përplasjen e plotë me Uashingtonin.
Sipas burimeve, oferta e tij përfshinte:
- dhënien e koncesioneve për kompanitë amerikane për nxjerrjen e naftës dhe arit në Venezuelë me mbrojtjen e garantuar të qeverisë së Karakasit,
- eksport të naftës me çmime të favorshme drejt SHBA-së,
- dhe uljen drastike të bashkëpunimit ekonomik me Rusinë, Kinën dhe Iranin.
Megjithëse oferta konsiderohej bujare dhe politike e rëndësishme për ndryshim orientimi ekonomik, administrata Trump e hodhi poshtë, duke e cilësuar të papranueshme për momentin.
Pas refuzimit, Uashingtoni ndërpreu edhe komunikimin informal me Karakasin, duke mbyllur kanalet diplomatike midis dy vendeve.
Në negociatat joformale kishte marrë pjesë edhe Richard Grenell, ish-përfaqësues special i qeverisë amerikane, i cili sipas burimeve hyri në konflikt të hapur me sekretarin e Shtetit, Marco Rubio, lidhur me qasjen ndaj Venezuelës.
Kujtojmë se marrëdhëniet midis Venezuelës dhe SHBA-së janë të ngrira për shkak të akuzave nga Shtëpia e Bardhë, e cila pretendon se nga Venezuela dërgohen sasi të mëdha narkotikësh drejt SHBA-së — akuza që autoritetet venezueliane i mohojnë.
Për më tepër, SHBA ka ofruar një shpërblim prej 50 milionë dollarësh për çdo informacion që do të çonte në arrestimin e presidentit Nicolás Maduro.
