Presidenti i Francës, Emmanuel Macron tha se vendi i tij do të shtojë operacionet humanitare në Rripin e Gazës pas Samitit të Paqes në Egjipt
Presidenti i Francës, Emmanuel Macron tha se vendi i tij do të shtojë operacionet humanitare në Rripin e Gazës pas Samitit të Paqes në Sharm el-Sheikh të mbajtur në Egjipt, transmeton Anadolu.
Duke folur për mediat në aeroport pas samitit të hënën, Macron tha se ishte i kënaqur që pa armëpushimin midis Izraelit dhe Hamasit të respektohej edhe lirimi i 20 pengjeve izraelite të gjalla nga grupi palestinez. Ai tha se të gjitha pengjet janë liruar dhe se operacionet e ndihmës në Gaza filluan me “intensitet më të madh se sa ishte planifikuar”, duke shtuar se përpjekjet humanitare do të përshpejtohen nga e marta.
Macron shtoi se Franca do të bashkëpunonte me SHBA-në dhe Izraelin për të siguruar shpërndarjen e pandërprerë dhe të papenguar të ndihmës në enklavë. Ai tha se një konferencë për ndihmë humanitare për Gazën do të mbahet në javët e ardhshme si pjesë e fazës së parë të armëpushimit. Sipas tij, “në fazën e dytë, fondet do të mobilizohen për të rinisur me shpejtësi stabilizimin dhe rindërtimin e Gazës”.
Pasi vuri në dukje pasiguritë e vazhdueshme lidhur me administrimin e Rripit të Gazës, Macron tha se Këshilli i Sigurimit të OKB-së ka arritur konsensus midis Autoritetit Palestinez dhe shteteve të tjera për të ecur drejt një rezolute dhe se puna teknike mbi çarmatimin e Hamasit do të fillojë së shpejti.
Presidenti i SHBA-së, Donald Trump njoftoi javën e kaluar se Izraeli dhe Hamasi ranë dakord për fazën e parë të një plani që ai paraqiti më 29 shtator për të vendosur armëpushim në Gaza, për të liruar të gjitha pengjet izraelite në këmbim të të burgosurve palestinezë dhe për një tërheqje graduale të forcave izraelite nga i gjithë Rripi i Gazës. Faza e parë e marrëveshjes hyri në fuqi të premten.
Faza e dytë bën thirrje për krijimin e një mekanizmi të ri qeverisës në Rripin e Gazës, formimin e një force shumëkombëshe dhe çarmatimin e Hamasit. Më herët të hënën, lirimi i palestinezëve të burgosur në burgjet izraelite filloi pasi Hamasi liroi të 20 pengjet e gjalla izraelite që mbaheshin në Rripin e Gazës.
Që nga tetori i vitit 2023, në sulmet e Izraelit janë vrarë mbi 67.800 palestinezë në enklavë, shumica prej tyre gra dhe fëmijë, dhe e kanë bërë atë kryesisht të pabanueshme.
