Luiz Inácio Lula da Silva pa dorashka në deklarata: Nuk besoj se Irani po ndërton bombë bërthamore, Perëndimi krijon mite të rreme
Presidenti brazilian Luiz Inácio Lula da Silva deklaroi se nuk beson që Irani po ndërton një bombë bërthamore, ashtu siç nuk kishte besuar që Saddam Hussein posedonte armë bërthamore kur George W. Bush ndërmori pushtimin e Irakut.
“Herë pas here, njerëzit krijojnë mite të rreme për të justifikuar një qëndrim të papranueshëm dhe të papërgjegjshëm”, tha Lula, duke aluduar në politikat e Perëndimit.
Duke folur në një konferencë për shtyp gjatë vizitës së tij në Gjermani, ai theksoi se dëshiron që Shtetet e Bashkuara të jenë ashtu siç duan të jenë, njësoj si Gjermania dhe Brazili.
“Dua që Brazili të organizohet ashtu siç dëshiron shoqëria braziliane. Askush nuk mund të ndërhyjë në organizimin tonë. Askush”, u shpreh ai.
Ai shtoi gjithashtu se do të jetë kundër çdo pushtimi ndaj Kubë.
“Ashtu siç kam qenë kundër ndërhyrjeve në Venezuelë, kundër asaj në Ukrainë, kundër asaj në Gaza dhe kundër Iranit. Jam kundër çdo mungese respekti ndaj integritetit territorial të kombeve”, deklaroi Lula.
Ai shtoi se është e rëndësishme të kuptohet se Kuba është viktimë e një bllokade 70-vjeçare.
“Kjo është një turp botëror, e dini? Një turp botëror. Një shtet që, pas revolucionit, kurrë nuk pati mundësi të vendosë vetë për fatin e tij, sepse një fuqi e madhe i imponoi një bllokadë ideologjike”, përfundoi ai.
