Fedpol: Falë informacioneve nga jashtë, shumë më tepër ndalime hyrjeje
Përveç rritjes së ndjeshme të ndalimeve të hyrjes, hetuesit janë përballur edhe me kriminalitetin e organizuar. Raporti i publikuar të enjten është raporti i parë vjetor nën drejtimin e drejtoreshës së re, Eva Wildi-Cortés. Ai përmban shembuj konkretë nga viti 2025 si dhe të dhëna statistikore. Ajo që bie në sy është se në vitin 2025 numri i ndalimeve të hyrjes pothuajse është katërfishuar.
Rritja e fortë lidhet kryesisht me fushën e terrorizmit. “Veçanërisht informacionet e përdorshme në gjykatë nga partnerët e huaj kontribuan që në mbi 500 raste të shqiptohen ndalime hyrjeje”, thuhet në raportin e Fedpol.
Sa i përket dëbimeve nga Zvicra në vitin 2025, ato kanë mbetur në nivele të ngjashme me vitet e mëparshme – gjithsej pesë raste, të cilat janë zbatuar të gjitha.
Një shembull: Europol u ka vënë në dispozicion shteteve anëtare një databazë me persona të lidhur me ISIS që ndodhen jashtë vendit. Megjithatë, raporti nuk jep detaje pse pikërisht në vitin 2025 Fedpol ka marrë kaq shumë informacione për persona të dyshuar për terrorizëm që synonin të hynin në vend.
“Ajsbergu” i kriminalitetit të organizuar
Fedpol synon të vendosë theks të veçantë në luftën kundër kriminalitetit të organizuar. Drejtoresha Wildi-Cortés e krahason këtë fenomen me një ajsberg, ku vetëm një pjesë e vogël është e dukshme.
“Ne nuk duam të godasim vetëm majën e ajsbergut. Duam të ngrohim ujin që i gjithë ajsbergu të shkrihet”, shkruan ajo.
Qasja e Fedpol bazohet në një strategji gjithëpërfshirëse shoqërore, duke synuar krijimin e një mjedisi ku rrjetet kriminale të mos mund të zhvillohen. Pjesë e kësaj strategjie është edhe hartimi i një Plani Kombëtar të Veprimit (NAP).
Masat kryesore për vitin 2026
Pasqyrë e situatës
Autoritetet kanë nevojë për analiza sa më konkrete mbi grupet kriminale, aktivitetet dhe rrjetëzimin e tyre. Fenomene të reja, si rekrutimi përmes rrjeteve sociale, duhet të identifikohen më shpejt. Për këtë po forcohet bashkëpunimi me universitetet në gjithë Zvicrën.
Ndërgjegjësim dhe trajnime
Politika, ekonomia dhe shoqëria duhet të jenë më të vetëdijshme për rreziqet e kriminalitetit të organizuar. Sektorë si financat, pasuritë e paluajtshme dhe lojërat e fatit kanë përgjegjësi të veçantë.
Rrjedha e raportimit
Shpesh punonjësit vërejnë parregullsi (si kompani fiktive apo persona të përdorur si “emra formalë”), por nuk dinë ku t’i raportojnë. Një nga masat kryesore është sqarimi i mënyrës, vendit dhe formës së raportimit të dyshimeve.
