Kryeministri i Sllovakisë, Robert Fico, mori pjesë në një tubim zgjedhor në qytetin Novi Sad të Serbisë, duke shprehur mbështetje të hapur për presidentin Aleksandar Vuçiq.
Fico e nisi në gjuhën serbe fjalimin e tij në tubimin zgjedhor të listës “Aleksandar Vuçiq – Serbia e Bashkuar”, të mbajtur në Sheshin e Lirisë.
Duke shprehur keqardhje që nuk kishte mundur të shkonte në Beograd dy javë më parë, Fico tha se atëherë i kishte dërguar Vuçiqit një mesazh mbështetjeje, ndërsa tani dëshironte ta shprehte personalisht përkrahjen e tij.
Ai theksoi se nuk kishte ardhur për t’u dhënë leksione qytetarëve të Serbisë se si duhej të votonin, por se e njihte Vuçiqin prej shumë vitesh dhe mbështeste punën e tij për zhvillimin e vendit.
Kryeministri sllovak tha se e mbështeste Vuçiqin për mbrojtjen e sovranitetit të Serbisë dhe të së drejtës së saj për të marrë vendime në mënyrë të pavarur. Ai pretendoi se disa qarqe ndërkombëtare po i vendosninSerbisë kushte të reja për anëtarësimin në Bashkimin Evropian.
Në fjalimin e tij, Fico u ndal edhe te gjendja e pakicës sllovake në Vojvodinë, duke falënderuar autoritetet serbe për qasjen ndaj këtij komuniteti. Ai njoftoi gjithashtu se në këtë rajon do të hapej një Shtëpi Sllovake.
Duke theksuar se qëndrimi i tyre për Kosovën nuk do të ndryshonte, Fico deklaroi se Sllovakia do të vazhdonte të qëndronte përkrah Serbisë.
Fico e përfundoi fjalimin duke vënë në pah marrëdhëniet miqësore me Serbinë dhe rëndësinë e ruajtjes së paqes dhe stabilitetit.
