Daniel Ella, komandant batalioni izraelit i cili lidhet me vrasjen e vajzës pesëvjeçare palestineze Hind Rajab, është plagosur rëndë gjatë operacioneve që ushtria izraelite IDF po zhvillon në Liban.
Këtë informacion e bëri të ditur drejtori i përgjithshëm i Fondacionit Hind Rajab Foundation, Dyab Abou Jahjah, përmes një postimi në platformën X.
HRF, i themeluar në vitin 2024, mbledh avokatë dhe aktivistë nga e gjithë bota me qëllim përgatitjen e rasteve ligjore kundër ushtarëve izraelitë, bazuar në përmbajtje të publikuar nga vetë ata në rrjetet sociale.
Jahjah kishte deklaruar më herët se fondacioni kishte dorëzuar një kallëzim kundër komandantit në Gjykata Ndërkombëtare Penale në Hagë.
Lutjet e dëshpëruara të fundit për ndihmë të Hind Rajab, teksa ishte e bllokuar në një makinë nën zjarr në Gaza, janë rrëfyer në filmin “Glas Hind Rajab”, i cili vitin e kaluar fitoi Çmimin e Luanit të Argjendtë në Festivalin e Filmit në Venecia dhe u nominua për Oscar.
Gjatë ofensivës izraelite, Hind kishte mbetur e bllokuar për orë të tëra në automjet, duke iu lutur përmes telefonit mjekëve palestinezë që të dërgonin ndihmë, ndërsa tezja, xhaxhai dhe tre kushërinjtë e saj ishin tashmë të vdekur.
Kur më në fund mbërriti ambulanca, kontakti me vajzën dhe ekipin e shpëtimit u humb. Dymbëdhjetë ditë më vonë, trupat e saj, të të afërmve dhe të dy punonjësve të urgjencës u gjetën në atë zonë.
