Zëvendëspresidenti i Shteteve të Bashkuara të Amerikës, JD Vance, mbërriti të hënën në mbrëmje në Hungari për të shprehur mbështetjen e presidentit Donald Trump për aleatin e tij, kryeministrin Viktor Orbán, në prag të zgjedhjeve parlamentare të pasigurta që mbahen këtë të diel.
Vance do të takohet me Orbánin të martën në mëngjes, pas së cilës do të mbajë një fjalim në tubimin “Dita e miqësisë hungaro-amerikane” në parkun sportiv MTK.
“Do të diskutojmë për një sërë çështjesh që lidhen me marrëdhëniet SHBA–Hungari”, u tha Vance gazetarëve gjatë nisjes nga baza ajrore Andrews pranë Uashingtonit.
Ai shtoi se është i bindur se bisedimet do të përfshijnë në masë të madhe edhe Evropën, Ukrainën dhe çështje të tjera.
Presidenti amerikan Trump, gjatë mandatit të tij të dytë, ka shprehur disa herë mbështetje për kryeministrin hungarez.
“E mbështes atë në zgjedhjet e ardhshme; në fakt, jam plotësisht në krahun e tij”, deklaroi presidenti amerikan.
Fushata e Viktor Orbánit është përqendruar në tema të politikës së jashtme, ku ai luan një rol të rëndësishëm duke mbajtur marrëdhënie të mira si me presidentin amerikan Donald Trump ashtu edhe me presidentin rus Vladimir Putin.
Megjithatë, sondazhet e instituteve të pavarura parashikojnë një fitore bindëse të partisë Tisza, e udhëhequr nga konservatori pro-evropian Péter Magyar. Nga ana tjetër, agjencitë pranë qeverisë paralajmërojnë fitore të koalicionit të Orbánit, Fidesz-KDNP.
Magyar, brenda vetëm dy vitesh, ka ndërtuar një lëvizje opozitare që është në gjendje të sfidojë dominimin e liderit aktual hungarez, i cili e ka shndërruar vendin në një model të demokracisë joliberale.
Që nga rikthimi në pushtet, administrata Trump ka hequr dorë nga përmbajtja tradicionale që qeveritë e mëparshme amerikane tregonin ndaj zgjedhjeve në vende të tjera. Në vend të kësaj, tani mbështesin hapur dhe fuqishëm liderët që i konsiderojnë ideologjikisht dhe diplomatikisht të afërt.
Në këtë kuadër, edhe sekretari amerikan i shtetit Marco Rubio vizitoi Budapestin në mes të shkurtit dhe i uroi “sukses” aleatit të tij hungarez.
“Mund t’ju them me siguri se presidenti Trump është thellësisht i përkushtuar ndaj suksesit tuaj, sepse suksesi juaj është edhe suksesi ynë”, tha Rubio në konferencën e përbashkët për media me Orbánin pas takimit.
Orbán është veçanërisht i linjëzuar me administratën Trump në çështjen e politikave kundër migracionit, të cilat në Hungari dolën në pah gjatë krizës së refugjatëve para dhjetë vitesh. Kryeministri hungarez ka vizituar disa herë edhe rezidencën e Trumpit, Mar-a-Lago në Florida.
