Fotoreporterja e gazetës amerikane “The Washington Post”, Heidi Levine, e cila u sulmua nga izraelitë në Bregun Perëndimor, ka mohuar deklaratat e kryeministrit izraelit Benjamin Netanyahu se sulmuesit kishin tentuar ta ndihmonin.
Ndërkohë që lufta në Gaza vazhdon prej më shumë se tre vjetësh, pushtimi dhe tensionet në territoret e tjera palestineze vijojnë. Territoret palestineze, veçanërisht Bregu Perëndimor dhe Jerusalemi Lindor, vazhdojnë të përballen me sulme dhe ngacmime nga kolonët izraelitë.
IZRAELITËT SULMOJNË GAZETAREN AMERIKANE
Fotoreporterja e “The Washington Post”, Heidi Levine, u sulmua nga një grup izraelitësh gjatë punës së saj në Bregun Perëndimor.
Duke folur në një emision të CNN-it, Levine tha se gjatë raportimit ishte rrahur nga kolonë izraelitë dhe se ata i kishin marrë sendet personale, përfshirë pajisjet e saj fotografike.
NETANYAHU PRETENDOI SE TENTUAN TA NDIHMONIN
Duke komentuar incidentin, Netanyahu deklaroi se detajet e ngjarjes ende nuk ishin plotësisht të qarta dhe se hetimet po vazhdonin.
Ai pretendoi se pasi Levine ishte rrëzuar në tokë, i njëjti person e kishte ndihmuar të ngrihej dhe kishte tentuar t’i ofronte ndihmë.
“DEKLARATA E NETANYAHUT NUK ËSHTË ASPAK E VËRTETË”
Levine i hodhi poshtë pretendimet e Netanyahut.
“Deklaratat e kryeministrit nuk janë aspak të vërteta. Arsyeja e vetme pse më ngritën në këmbë ishte sepse nuk kishin arritur të merrnin gjithçka që kisha mbi supe dhe donin të më grabisnin”, tha ajo.
“EDHE PALESTINEZËT NË ZONË U SULMUAN”
Levine tregoi se sulmuesit e kishin goditur vazhdimisht me shqelma dhe shkopinj. Ajo tha se në një moment kishte vendosur të mos reagonte, me shpresën se sulmi do të përfundonte.
Sipas saj, sulmuesit i morën kamerat, çantën me objektiva, pasaportën amerikane, kartat e kreditit, dokumentet dhe kartat e memories.
Levine tregoi gjithashtu se nga qafa ia kishin shkëputur edhe një varëse ari që ia kishte dhuruar vajza për ditëlindje.
Ajo tha se edhe palestinezët që kishin tentuar ta shpëtonin nga sulmuesit ishin sulmuar.
E pyetur për përgjegjësinë e Netanyahut, ministrit të Financave Bezalel Smotrich dhe ministrit të Sigurisë Kombëtare Itamar Ben-Gvir, Levine tha se kishte raportuar vazhdimisht për retorikën dhe vizitat e tyre në Bregun Perëndimor.
“Mendoj se përgjigjja është mjaft e qartë”, tha ajo.
GAZETARËT TË SHQETËSUAR PËR SIGURINË
Levine tha se gazetarët tashmë lëvizin së bashku për shkak të shqetësimeve për sigurinë.
Sipas saj, për t’u mbrojtur nga sulmet e kolonëve izraelitë, gazetarët nuk vendosin më as shenja që tregojnë se automjetet e tyre i përkasin shtypit.
Levine tregoi se një ditë para sulmit kishin mësuar se ushtria izraelite u kishte dhënë leje fermerëve palestinezë për të mbledhur ullinjtë. Ajo ngriti pyetjen se përse, pavarësisht kësaj, nuk ishte parandaluar grumbullimi i kolonëve në zonë.
Sipas saj, ndërsa ushtria izraelite po lëvizte drejt palestinezëve, kolonët izraelitë po përparonin së bashku me ushtarët. Pikërisht në ato momente, tha Levine, ajo u sulmua dhe u rrëzua në tokë.
Fotoreporterja tregoi se gjatë karrierës së saj kishte përjetuar edhe më parë sulme të ngjashme, por se nuk kishte parë kurrë një nivel të tillë dhune në Bregun Perëndimor dhe në Izrael.
“I KUPTOJ MË MIRË PALESTINEZËT”
Levine tha se pas sulmit e kupton shumë më mirë atë që përjetojnë palestinezët.
“Pasi u sulmova, mund ta kuptoj vërtet se çfarë kanë përjetuar gratë, fëmijët dhe burrat palestinezë që kam takuar”, tha ajo.
Levine theksoi se ajo që përjetoi është kthyer në një përvojë jashtëzakonisht personale për të.
“Kjo ngjarje e ka forcuar edhe më shumë vendosmërinë time për të vazhduar punën dhe për të bërë përpjekje që të sjell një ndryshim”, u shpreh ajo.
Levine tha se aktualisht ndodhet në një vend të sigurt, por theksoi se palestinezët që ka takuar nuk kanë të njëjtat mundësi për t’i mbajtur familjet e tyre të sigurta dhe për t’u larguar nga dhuna.
