Holanda po përballet me kërcënimin më të madh ndaj sigurisë kombëtare që nga përfundimi i Lufta e Dytë Botërore, i cili kryesisht vjen nga Rusia dhe Kina, në një rend botëror gjithnjë e më të paparashikueshëm, njoftoi sot agjencia holandeze e inteligjencës.
“Në 80 vite ekzistence nuk kemi parë një nivel kërcënimi si ky aktual, ku siguria kombëtare është nën presion për një kohë kaq të gjatë dhe nga kaq shumë drejtime njëkohësisht”, tha drejtoresha e AIVD-së, Simone Smit, gjatë prezantimit të raportit vjetor.
“Po shohim një rend botëror të paqëndrueshëm dhe të paparashikueshëm, pas dekadave kur stabiliteti dhe parashikueshmëria ishin themeli i prosperitetit dhe paqes”, shtoi ajo.
Si edhe në vitet e kaluara, AIVD theksoi kërcënimet ndaj Holandës – një nga themelueset e NATO dhe Bashkimi Evropian – që vijnë nga Rusia dhe Kina. Sipas raportit, Rusia është bërë edhe më agresive ndaj vendeve perëndimore, përfshirë Holandën, kryesisht përmes sulmeve kibernetike.
“Një konflikt ushtarak nuk është më i paimagjinueshëm”
“Rusia po përgatitet për një përballje afatgjatë me Perëndimin”, thuhet në raport. “Si pasojë, një konflikt ushtarak mes Rusisë dhe Perëndimit nuk është më i paimagjinueshëm.”
Rusia mohon çdo plan për të sulmuar vendet e NATO-s, por akuzon “Perëndimin kolektiv” për kërcënim ndaj sigurisë së saj, veçanërisht përmes mbështetjes financiare dhe ushtarake për Ukrainën.
AIVD thekson gjithashtu se Kina vazhdon përpjekjet “e paligjshme” për të siguruar teknologji të avancuar, me synimin për të “riformësuar rendin botëror” sipas interesave të saj. Agjencia e ka konsideruar prej kohësh Kinën si kërcënimin më të madh për sigurinë ekonomike të Holandës, duke theksuar se ky rrezik është thelluar edhe gjatë vitit 2025.
Kina mohon se vepron në mënyrë të paligjshme në ndjekjen e interesave të saj ekonomike apo se përbën kërcënim për vendet perëndimore.
Në planin e brendshëm, grupet xhihadiste dhe ato të ekstremit të djathtë përbëjnë kërcënimin kryesor për sigurinë në Holandë, ndërsa të dyja po fitojnë mbështetje shqetësuese tek një pjesë e të rinjve, thuhet në raport.
