Kryenegociatori i Hamasit ka deklaruar se grupi ka marrë garanci nga SHBA-ja dhe ndërmjetësit ndërkombëtarë që konfirmojnë se “lufta ka përfunduar përfundimisht”. Tani mbetet që Izraeli të votojë për miratimin e marrëveshjes së armëpushimit.
“Sot shpallim se është arritur marrëveshja për përfundimin e luftës dhe agresionit kundër popullit tonë, dhe për fillimin e zbatimit të armëpushimit të përhershëm dhe tërheqjes së forcave pushtuese,” tha Khalil Al-Hayya në një fjalim televiziv.
Ai shtoi se, si pjesë e marrëveshjes, do të lirohen 250 palestinezë të dënuar me burgim të përjetshëm, si dhe 1.700 të burgosur nga Gaza që u arrestuan pas 7 tetorit.
Kabineti i sigurisë i Izraelit ka përfunduar mbledhjen, dhe tani pritet mbledhja e qeverisë që do të votojë për marrëveshjen e cila përcakton kushtet e armëpushimit dhe planin për lirimin e pengjeve.
Pasi Izraeli ta miratojë marrëveshjen e armëpushimit, ajo do të hyjë në fuqi brenda 24 orëve — pra nesër. Të burgosurit izraelitë mund të lirohen në fillim të javës së ardhshme.
