Ministria gjermane tha se masa e Rusisë përbënte kërcënime të drejtpërdrejta që synonin dobësimin e mbështetjes së Berlinit për Ukrainën dhe vënien në provë të unitetit evropian
Gjermania ka thirrur ambasadorin e Rusisë pasi Moska publikoi një listë të kompanive evropiane të mbrojtjes që pretendon se ishin të përfshira në prodhimin e dronëve ukrainas dhe i përshkroi ato si objektiva të mundshme ushtarake, transmeton Anadolu.
Ministria e Punëve të Jashtme e Gjermanisë tha se masa e Rusisë përbënte kërcënime të drejtpërdrejta që synonin dobësimin e mbështetjes së Berlinit për Ukrainën dhe vënien në provë të unitetit evropian.
“Kërcënimet e drejtpërdrejta nga Rusia kundër objektivave në Gjermani janë një përpjekje për të dobësuar mbështetjen tonë për Ukrainën dhe për të vënë në provë unitetin tonë. Përgjigja jonë është e qartë. Ne nuk do të frikësohemi. Kërcënime të tilla dhe të gjitha format e spiunazhit në Gjermani janë plotësisht të papranueshme”, tha ministria në rrjetet sociale.
Ministria njoftoi se kishte thirrur ambasadorin rus po atë ditë.
javën e kaluar, Ministria e Mbrojtjes e Rusisë publikoi listën duke identifikuar disa kompani mbrojtëse në të gjithë Evropën që pretendonte se ishin të lidhura me prodhimin e dronëve ukrainas. Tre nga kompanitë janë të vendosura në Gjermani.
Në dokument, Moska i përshkroi vendet e origjinës së kompanive si pjesë të “prapavijës strategjike” të Ukrainës, gjuhë që media gjermane e interpretoi si një justifikim implicit për sulme të mundshme ushtarake ose operacione të fshehta kundër tyre.
Sipas raporteve të mediave lokale, Dmitry Medvedev, ish-president rus dhe nënkryetar i Këshillit të Sigurisë së Rusisë, e përshkallëzoi retorikën duke e quajtur listën “një listë objektivash të mundshëm” për forcat e armatosura ruse.
