Kompania gjermane e industrisë së mbrojtjes Rheinmetall do t’i furnizojë Ukrainës me sisteme shtesë të mbrojtjes ajrore Skyranger 35, të cilat do të paguhen me fondet e fituara nga shitja e pasurisë së ngrirë të oligarkëve rusë në vendet e Bashkimit Evropian.
Kontrata do të zbatohet midis kompanisë Rheinmetall dhe një qeverie evropiane që do të marrë pjesë në procesin e blerjes së këtyre sistemeve të mbrojtjes ajrore.
“Jemi mirënjohës për besimin që na ka dhënë Ukraina. Gjithashtu falënderojmë një nga shtetet anëtare të BE-së për mbështetjen, e cila nënvizon përpjekjet tona të vazhdueshme për të ndihmuar Ukrainën,” deklaroi drejtori ekzekutiv i Rheinmetall-it, Armin Papperger.
Pjesa kryesore e pagesës do të mbulohet nga shitja e pasurisë së ngrirë të oligarkëve rusë në vendet e BE-së, duke shënuar kështu fillimin e procesit të gjatë të paralajmëruar të përdorimit të fondeve të sekuestruara ruse për blerjen e armëve për Ukrainën.
Kjo lëvizje vjen në një moment kur ushtria ruse po intensifikon sulmet ajrore gjatë natës ndaj qyteteve ukrainase, ndërsa BE-ja dhe aleatët perëndimorë po kërkojnë mënyra të reja për të garantuar furnizimin e qëndrueshëm të Ukrainës me armë mbrojtëse.
