Qeveria gjermane i kërkon Kroacisë që t’i zgjidhë në mënyrë konstruktive mosmarrëveshjet dypalëshe me Malin e Zi, të cilat rrezikojnë të bllokojnë anëtarësimin në Bashkimin Evropian të vendit kandidat më të avancuar në këtë proces. Këtë e kanë konfirmuar për Euronews katër zyrtarë të njohur drejtpërdrejt me situatën.
Zagrebi u dërgoi të hënën vendeve të tjera anëtare të BE-së një dokument me tetë kërkesa që Podgorica duhet t’i përmbushë përpara përfundimit të negociatave të anëtarësimit. Sipas Euronews, Berlini po punon prapa skenave që zgjerimi të mos humbasë vrullin. Së fundmi ka ofruar edhe ndërmjetësim, por kjo ofertë ende nuk është konkretizuar.
Trashëgimia e luftës, pronat dhe kufiri
Kërkesat e Zagrebit lidhen kryesisht me pasojat e luftërave të viteve ’90: personat e zhdukur, krimet e luftës, kampet e burgimit, pronat e konfiskuara dhe kufirin. Sipas dokumentit të publikuar nga BIRN, Kroacia kërkon edhe kthimin e anijes shkollore “Jadran”. Para shpërbërjes së Jugosllavisë, anija ndodhej në Split, ndërsa kur nisi lufta në vitin 1991, ajo ishte për riparim në Mal të Zi.
Kroacia kërkon gjithashtu që Mali i Zi të konfirmojë respektimin e kufirit të dikurshëm mes dy republikave, në përputhje me përfundimet e Komisionit të Badinterit, raportoi Euronews Albania.
Mali i Zi konsiderohet kandidati më i avancuar për anëtarësim dhe shpreson të bëhet anëtari i 28-të i BE-së në vitin 2028. Të hënën mbylli edhe tre kapituj negociues, duke e çuar në 21 numrin e kapitujve të mbyllur nga gjithsej 33. Meqë çdo shtet anëtar ka të drejtë vote në procesin e anëtarësimit, Zagrebi ka një mjet të fuqishëm ndikimi ndaj fqinjit të tij.
Franca dhe Luksemburgu kundër bllokadave
Disa vende anëtare po përpiqen të parandalojnë që çështjet dypalëshe ta ndalin procesin. Franca dëshiron të shmangë pengesat ndaj zgjerimit për arsye të politikës së brendshme, ndërsa Luksemburgu kritikon përdorimin e procesit të anëtarësimit për zgjidhjen e mosmarrëveshjeve dypalëshe.
Megjithatë, presioni më i fortë vjen nga Berlini. Zyrtarët e BE-së e shohin nismën e qeverisë gjermane si shenjë se Berlini po merr drejtimin e procesit. Podgorica këtë vit kryeson Procesin e Berlinit, nismën për bashkëpunim rajonal në Ballkanin Perëndimor, dhe muajt e fundit ka bashkëpunuar ngushtë me qeverinë gjermane.
Procesi i anëtarësimit të Malit të Zi po zhvillohet në një kohë kur Brukseli po e përdor gjithnjë e më shumë zgjerimin për t’i lidhur më fort vendet fqinje me Perëndimin, për shkak të tensioneve me Rusinë. Gjermania vlerëson se, duke marrë parasysh përpjekjet e Podgoricës dhe rrethanat gjeopolitike, ka ardhur koha që anëtarësimi i saj të ecë përpara.
Convert to P
