Ndërsa stacionet e karburantit në anën gjermane qëndrojnë pothuajse bosh, vetëm disa qindra metra përtej kufirit në anën polake pompat po punojnë me kapacitet të plotë. Shumica e automjeteve që furnizohen janë me targa gjermane.
Me rritjen e tensioneve në Lindjen e Mesme në fund të shkurtit, tregjet globale të energjisë kanë shënuar një rritje të madhe.
Për gjermanët, të cilët tashmë përballen me një tranzicion kompleks energjetik, rritja e çmimeve në stacionet e karburantit është kthyer në një barrë shtesë.
Në një stacion pranë Berlinit, mbushja e pak më shumë se gjysmës së rezervuarit, që më parë kushtonte rreth 70 euro para konfliktit SHBA-Izrael kundër Iranit, tani kushton rreth 96 euro.
Diferencë e madhe çmimesh në kufi
Në qytetin kufitar Frankfurt (Oder), rreth 90 minuta larg Berlinit, çmimi i naftës ka arritur në 2,149 euro për litër, ndërsa benzina në 2,029 euro.
Në anën tjetër të urës, në qytetin polak Słubice, situata është krejt ndryshe.
Atje, benzina kushton rreth 1,61 euro për litër, që përkthehet në një kursim prej rreth 30 euro për çdo mbushje për shoferët gjermanë.
“Turizmi i karburantit” bëhet trend i ri
Një punonjës lokal në Gjermani, Markus, tha:
“Furnizohem këtu vetëm sepse është makinë kompanie dhe duhet të respektoj rregullat tatimore. Po të ishte makina ime, do të kaloja menjëherë në anën tjetër. Atje është rreth 40 cent më lirë për litër.”
Për disa gjermanë, ky udhëtim nuk është më vetëm furnizim i shpejtë me karburant, por është kthyer në një formë “turizmi të karburantit”.
Thomas Genoth, drejtues mediatik nga Halle, i cili udhëtoi mbi 200 kilometra me bashkëshorten për të arritur në Słubice, tha se pasi mbushin rezervuarin, blejnë edhe produkte ushqimore dhe mallra shtëpiake më të lira, si dhe shijojnë një vakt tradicional polak.
Ai gjithashtu u shpreh i shqetësuar për situatën aktuale gjeopolitike:
“Duket sikur presioni energjetik gjithmonë bie mbi njerëzit e zakonshëm.”
Masa nga autoritetet gjermane
Autoritetet gjermane kanë rritur kontrollet në kufi për të parandaluar transportin e paligjshëm të karburantit të lirë.
Ndërsa shoferëve u lejohet të mbushin rezervuarët, sasia shtesë e karburantit pa taksa që mund të transportohet është kufizuar në bidona prej 20 litrash.
Nga ana tjetër, qeveria gjermane po përshpejton një paketë të re ndihme për të mbrojtur konsumatorët nga luhatjet e çmimeve.
Në këtë paketë përfshihet edhe propozimi që stacionet e karburantit të lejohen të rrisin çmimet vetëm një herë në ditë.
Kancelari Friedrich Merz, në një deklaratë në rrjetet sociale, theksoi se “rritja e çmimeve të gazit si pasojë e krizës në Iran është një shqetësim për shumë njerëz”, duke nënvizuar angazhimin e qeverisë për të lehtësuar këtë barrë.
