Forcat amerikane kanë sulmuar një tjetër anije që dyshohej se transportonte drogë, këtë herë në ujërat e Oqeanit Paqësor, ka konfirmuar Pentagoni.
Sipas sekretarit amerikan të mbrojtjes, Pete Hegseth, dy persona në bord kanë humbur jetën, ndërsa asnjë pjesëtar i forcave amerikane nuk është plagosur.
Hegseth tha, sipas raportimeve të BBC-së, se anija ishte e njohur për shërbimet amerikane të inteligjencës dhe besohej se po transportonte drogë përgjatë një rruge të njohur të kontrabandës në ujërat ndërkombëtare.
Ky sulm shënon sulmin e tetë amerikan kundër anijeve të dyshuara për trafik droge që nga 2 shtatori, por të parin në Oqeanin Paqësor.
“Narkoterroristët që synojnë të pozicionohen pranë brigjeve tona nuk do të gjejnë strehë të sigurt askund në hemisferën tonë,” deklaroi Hegseth.
Të paktën 36 persona janë vrarë deri më tani në sulmet amerikane kundër anijeve të dyshuara për transport droge, përfshirë edhe një incident të fundit në Karaibe.
Presidenti amerikan Donald Trump dhe zyrtarë të administratës së tij i kanë justifikuar këto sulme si masa të nevojshme në luftën kundër trafikut ndërkombëtar të drogës, duke theksuar se disa nga këto organizata janë shpallur si organizata terroriste nga SHBA.
Vendi i saktë i goditjes më të fundit dhe origjina e anijes mbeten të paqarta. Megjithatë, lajmi vjen në një kohë tensionesh në rritje ndërmjet administratës Trump dhe qeverisë kolumbiane të presidentit Gustavo Petro.
Deri më sot, autoritetet amerikane kanë dhënë pak detaje mbi identitetin e personave të vrarë apo për organizatat e trafikut të drogës me të cilat dyshohet se ishin të lidhur.
Rreth 10.000 ushtarë amerikanë, si dhe dhjetëra avionë e anije luftarake, janë aktualisht të dislokuara në Karaibe si pjesë e një operacioni të gjerë kundër trafikimit të drogës.
