Është kaluar në fazën e dytë të armëpushimit mes Izraelit dhe Hamasit. Sipas njoftimeve nga Shtetet e Bashkuara, Turqia ka ofruar të dërgojë një ekip prej 81 ekspertësh të specializuar në kërkim-shpëtim nga përvojat e tërmeteve, për të ndihmuar në nxjerrjen e trupave të pengjeve të pajetë nën rrënojat e Gazës.
Nënshkrimi i “Deklaratës së Synimit”
Pas arritjes së armëpushimit në Gaza, në samitin ku morën pjesë SHBA, Turqia, Katari dhe Egjipti, u nënshkrua dokumenti i quajtur “Deklarata e Synimit”.
SHBA: Faza e dytë ka nisur, Turqia gati për ndihmë
Administrata amerikane konfirmoi se është kaluar në fazën e dytë të armëpushimit dhe se procesi i identifikimit dhe nxjerrjes së trupave përballet me vështirësi të mëdha për shkak të shkatërrimit masiv.
Një këshilltar i lartë amerikan, në një konferencë për shtyp përmes videolidhjes, shpjegoi:
“Faza e parë kishte të bënte me tërheqjen e Izraelit në vijën e verdhë, krijimin e kushteve për armëpushim, sigurimin e ndihmave humanitare dhe shkëmbimin e pengjeve të gjalla e të burgosurve. Kjo fazë u përfundua me sukses.”
Në fazën e dytë, tha ai, dorëzimi i trupave të pengjeve të pajetë është një hap vendimtar, ndërsa Hamas dhe disa vende, përfshirë Turqinë, po tregojnë gatishmëri për bashkëpunim emergjent.
Ekipi turk me përvojë në tërmete
Një tjetër këshilltar amerikan tha:
“Për të kuptuar kaosin në Gaza, duhet t’i shihni kushtet atje. Rripi i Gazës është pothuajse i shkatërruar plotësisht; rrënojat janë të mëdha dhe ka shumë municione të paeksploduara.”
Ai shtoi se nën rrënoja ka shumë trupa dhe se Turqia ka ofruar një ekip prej 81 specialistësh, të cilët do të dërgohen në terren me mbështetjen e palëve të tjera ndërkombëtare.
Sipas tij, mospasja e mundësisë së Hamasit për t’i dorëzuar të gjitha trupat nuk do të konsiderohet si shkelje e marrëveshjes, sepse kushtet në terren janë jashtëzakonisht të vështira.
Ushtria turke është gati
Ministri turk i Mbrojtjes, Yaşar Güler, në takimin e ministrave të mbrojtjes të NATO-s, deklaroi se Turqia do të vazhdojë ndihmat humanitare dhe se Forcat e Armatosura Turke janë të gatshme të marrin pjesë në një forcë shumëkombëshe që mund të vendoset në Gaza.
Procesi i dorëzimit të trupave
Në kuadër të armëpushimit, po vazhdon procesi i dorëzimit të trupave të pengjeve dhe të burgosurve që kanë humbur jetën.
Sipas autoriteteve shëndetësore lokale, 45 trupa të palestinezëve janë dorëzuar nga Izraeli në Gazë.
Izraeli vazhdon të mbajë qindra trupa të palestinezëve të vrarë që prej 7 tetorit 2023.
Nga ana tjetër, 6 trupa të pengjeve izraelitë janë dorëzuar nga Hamas përmes Kryqit të Kuq, ndërsa dihet se në duart e Hamasit ndodheshin gjithsej 24 trupa pengjesh.
Shenja torture në trupat e palestinezëve
Anëtari i komisionit të ngarkuar me pranimin e trupave në Spitalin Nasser, Sameh Hamad, tha se në disa trupa janë vërejtur shenja torture dhe ekzekutimi.
“Disa kishin duar dhe këmbë të lidhura, disa kishin shenja në qafë nga litarë ose shiritë ngjitës. Shumica ishin civilë, por disa ishin me uniforma,” deklaroi Hamad.
Ai shtoi se vetëm tre emra janë bërë publikë nga ekipi i Kryqit të Kuq që i dorëzoi trupat.
