Kryeministri i Shqipërisë, Edi Rama, reagoi pasi shaka e tij për presidentin amerikan Donald Trump u bë virale në rrjetet sociale.
Në një bisedë me presidentin francez Emmanuel Macron dhe presidentin e Azerbajxhanit, Ilham Aliyev, Rama talli gafet e Trumpit, përkatësisht faktin që ai disa herë përmendi Shqipërinë duke menduar për Armeninë.
Inçizimi i shakasë dhe bisedës së tij me Macronin dhe Aliyevin u përhap shpejt në rrjetet sociale, gjë që e pengoi Ramën, i cili reagoi ndaj vëmendjes që ky video mori në mediat botërore.
“Është vërtet e pabesueshme se si funksionojnë sot mediat dhe si e ashtuquajtura ‘viralitet’ kaq lehtë mund ta shtrembërojë realitetin. Një fjali e thënë me qëllim të mirë, në frymën e miqësisë, papritur bëhet titull botëror i një samiti të tërë mes dhjetëra shtetesh, ndërsa gjithçka tjetër, ajo që është thelbësore, bëhet e parëndësishme,” shkroi Rama në X.
Ai shtoi se ishte “një kënaqësi e vërtetë” të ishte me Macronin dhe Aliyevin, të cilët i quajti “miq të dashur”.
“Ishte kënaqësi të kujtohej lapsusi i presidentit Trump se edhe Shqipëria paskësh arritur të bëjë paqe me Azerbajxhanin, ndërkohë që vetë Emmanuel kishte punuar gjatë dhe pa u lodhur për të sjellë paqen mes Azerbajxhanit dhe Armenisë,” shkroi ai.
Kryeministri shqiptar e quajti këtë “një vërejtje të padëmshme” dhe “një moment të këndshëm”.
“Sigurisht, nuk ka asgjë të keqe nëse kjo përcillet, por ta shtrembërosh atë në helm politik është thjesht e padrejtë,” u shpreh Rama.
Ai shtoi edhe disa lavdërime në adresë të presidentit amerikan.
“E vërteta është që presidenti Trump u tregua një lider që e riktheu fjalën ‘paqe’ në fjalorin e Perëndimit pas shumë vitesh. Dhe po, në një kohë tepër të shkurtër, ai arriti paqe atje ku të tjerët u përpoqën dhe nuk ia dolën, dhe vazhdon ta ndjekë atë pa u lodhur,” tha ai.
Në fund shtoi se “ai moment nuk ishte asgjë tjetër veçse një moment i vogël humori të mirë mes njerëzve që, në fakt, janë ndër admiruesit më të mëdhenj të presidentit Trump.”
