Dhjetëra mijëra hebrenj ultraortodoksë u mblodhën të enjten në Jerusalem në një protestë masive kundër futjes së shërbimit të detyrueshëm ushtarak, duke shtuar më tej tensionet politike brenda koalicionit të kryeministrit Benjamin Netanyahu.
Sipas vlerësimeve të mediave izraelite, rreth 200 mijë protestues – kryesisht burra me rroba të zeza tradicionale dhe kapele të gjera – bllokuan rrugët kryesore në hyrje të qytetit, duke shkaktuar një kolaps të plotë të trafikut.
“Për momentin, ata që refuzojnë të shërbejnë në ushtri përfundojnë në burg. Por ne jemi shtet hebre – nuk mund të luftoni kundër judaizmit në një shtet hebre,” tha një nga pjesëmarrësit, Shmuel Orbach.
Studentët ultraortodoksë të shkollave fetare kanë qenë për vite të tëra të përjashtuar nga shërbimi i detyrueshëm, gjë që ka shkaktuar pakënaqësi mes qytetarëve që besojnë se barra e mbrojtjes së vendit nuk shpërndahet në mënyrë të drejtë – veçanërisht pas humbjeve të rënda të ushtrisë izraelite në konfliktet e fundit në Gaza, Liban dhe Iran.
Vitin e kaluar, Gjykata e Lartë e Izraelit hoqi përjashtimin për studentët ultraortodoksë, ndërsa parlamenti që atëherë ka dështuar të miratojë një ligj të ri për rekrutimin që do të kënaqte si ushtrinë ashtu edhe partitë fetare.
Dy aleatë afatgjatë të Netanyahut, partitë Shas dhe Judaismi i Bashkuar Toryk (UTJ), e braktisën koalicionin në korrik për shkak të propozimit të kontestuar të ligjit, duke e lënë qeverinë në një pozitë të brishtë politike.
Edhe pse dyert për rikthimin e tyre në koalicion mbeten të hapura, një kompromis me liderët fetarë mund të shkaktojë pakënaqësi tek votuesit laikë përpara zgjedhjeve të ardhshme dhe të përballet me rezistencë nga Gjykata e Lartë, raporton Reuters.
