Ministri izraelit i sigurisë kombëtare, Itamar Ben Gvir, bllokoi mbledhjen e kabinetit të sigurisë duke vënë veton ndaj lirimit të disa të burgosurve palestinezë, përfshirë ata të dënuar për terrorizëm. Kërkesa e tij ishte arsyeja e shtyrjes së përkohshme të mbledhjes së kabinetit të sigurisë, e cila duhej të miratonte marrëveshjen për armëpushim. Po ashtu, kjo ndërhyrje shtyu edhe votimin e kabinetit për ratifikimin e marrëveshjes, raportojnë mediat izraelite.
Mbledhja e kabinetit të sigurisë ka përfunduar së fundmi, ndërsa mbledhja e përgjithshme e kabinetit, e planifikuar fillimisht për në orën 18:00, u shty për më shumë se tre orë, duke vonuar edhe më tej miratimin e pritur të marrëveshjes për armëpushim.
Sipas marrëveshjes, Izraeli pritet të lirojë 250 të burgosur palestinezë të dënuar me burgim të përjetshëm, si dhe 1.700 banorë të Gazës të arrestuar pas sulmeve të Hamasit më 7 tetor 2023, me të cilat filloi lufta.
Hamas ka shpallur fundin e luftës, duke deklaruar se ka marrë garancitë e nevojshme të sigurisë nga Shtetet e Bashkuara. Tani mbetet vetëm që Izraeli të miratojë marrëveshjen për armëpushim, e cila do të hyjë në fuqi 24 orë pas miratimit të saj.
