Komiku egjiptiano-amerikan Bassem Youssef, i cili pritet të performojë së shpejti në Sarajevë, deklaroi se është përfshirë nga Ministria izraelite për Diasporën në një “listë për eliminim”, duke u thënë ndjekësve se kjo mund të jetë mundësia e fundit për ta parë gjallë.
“Shansi i fundit të më shihni gjallë”, tha ai.
Në një video të publikuar, pretendohet se Ministria izraelite për Diasporën ka shpallur një listë me “10 personat më me ndikim antisemitë”, ku përfshihet edhe Youssef.
“Jam në top 10 në listën e zezë të qeverisë izraelite. E gjithë jeta ime më ka çuar deri këtu. Tani që jam në një listë për eliminim, ju lutem blini biletat për Evropë para se të mbarojnë ose para se të më vrasin. Kjo është mundësia e fundit të më shihni gjallë. Turneu ‘Belly of the Beast’. Merrni biletën tuaj. Mirupafshim”, u shpreh ai.
Ai do të performojë më 17 qershor në orën 20:30 në sallën “Dom mladih” në Sarajevë.
I njohur shpesh si “Jon Stewart-i egjiptian”, Bassem Youssef sjell një kombinim unik të humorit inteligjent, satirës politike dhe historive personale që kanë fituar audienca në mbarë botën.
Pas një serie shfaqjesh të shitura plotësisht dhe interesit të madh global, turneu i tij i ri, përveç qyteteve si Vjena, Berlini dhe Parisi, do të ndalet edhe në Sarajevë, duke premtuar një mbrëmje që tejkalon formatin klasik të stand-up-it.
Publikun e pret një program dinamik, provokues dhe i mprehtë, që jo vetëm argëton, por edhe nxit reflektim dhe diskutim.
