Partitë kryesore po i afrohen balotazhit pa koalicion në komuna të mëdha si Prishtina, Mitrovica e Gjilani. Në Gjakovë e Pejë, LVV-ja po ofron marrëveshje e pozita për koalicion. Në disa komuna të tjera tashmë partitë kanë arritur disa marrëveshje.
Gazeta Express
Liderët e partive politike do të shkojnë në një takim të thirrur nga presidentja Vjosa Osmani për nesër në mesditë, ndërsa përpjekjet e para për formimin e një qeverie të re gati nëntë muaj pas zgjedhjeve parlamentare të 9 shkurtit dështuan.
Albin Kurti, që ishte i mandatuari i parë për formimin e qeverisë së re, nuk arriti ta krijonte një shumicë të re parlamentare në Kuvend të dielën.
Por para zgjedhjeve të reja parlamentare, një rund i dytë dhe përcaktues për udhëheqjen e 18 komunave të vendit i pret këto parti më 9 nëntor.
Në komunat e mëdha si Prishtina, Mitrovica e Gjilani dihet më pak për diskutimet ndërmjet partive politike për ndonjë koalicion të mundshëm dhe ende nuk ka ndonjë marrëveshje të bërë publike.
Në kryeqytet, Përparim Rama që mori 33.71% të votave, tha dje se ka koalicion me “qytetarët dhe me të gjithë ata që besojnë në vizionin tonë”. As kundërkandidati i tij nga LVV-ja, Hajrulla Çeku, që mori 33.21% të votave, nuk ka bërë të ditur lidhjen e ndonjë koalicioni.
Ngjashëm qëndron situata edhe në Mitrovicë, ku kandidati i LVV-së, Faton Peci, që mori 47.94% të votave dhe kandidati i PDK-së, Arian Tahiri, që mori 47.57%, do të garojnë për karrigen e kryetarit.
Kryetari aktual i Gjilanit, Alban Hyseni i LVV-së, shpreson ta rrisë mbështetjen e marrë në rundin e parë të garës, ku mori 49.80%. Kundërkandidati i tij nga LDK-ja, Arbër Ismajli, ka marrë 34.29%.
Në Gjakovë, Ardian Gola i LVV-së që ka marrë 31.89%, po kërkon t’ia marrë udhëheqjen e komunës kryetarit aktual, Ardian Gjinit të AAK-së, i cili ka marrë 47.53% të votave. Ai ia ka dërguar sot një ftesë publike LDK-së atje, kandidati i së cilës, Shefqet Shehu ka marrë 7.94% të votave.
Gola i thotë Shehut se “në vend të vazhdimit të status quo-së që i mban qytetarët peng të pak duarve, bashkë me LDK-në mund ta kthejmë Gjakovën në shembull të një rotacioni demokratik për tërë Kosovën”, siç i ka shkruar në letrën e bërë publike. Një takim për zyrtarizimin e marrëveshjes është kërkuar në fund të saj.
Kandidati i LVV-së për kryetar të Pejës, Taulant Kelmendi, i cili ka marrë 27.78% të votave në rundin e parë të 12 tetorit, synon t’ia marrë udhëheqjen e komunës kryetarit aktual, Gazmend Muhaxherit të LDK-së i cili ka marrë 46.25% të votave.
Në këtë përpjekje, ai ka njoftuar së fundmi se ia ka dërguar një ftesë për koalicion kryetarit të AAK-së në Pejë, Ali Berishës, i cili në rundin e parë doli i treti me 18.21% të votave.
LVV në Pejë i ka ofruar publikisht AAK-së marrëveshje për “prioritizimin e projekteve për 4 vite qeverisje”, postin e kryesuesit të Kuvendit Komunal dhe 6 drejtori komunale. Një takim i kërkuar mes përfaqësuesve të këtyre dy partive atje nuk duket se ka ndodhur ende, apo të paktën nuk është bërë i ditur.
Bashkëpartiaku i Golës e Kelmendit i cili garon për kryetar të Prizrenit, ka nënshkruar tashmë marrëveshje për koalicion me AAK-në, kandidati i së cilës mori 3.47% të votave në rundin e parë. Artan Abrashi, i cili ka marrë 30.39% të votave në rundin e parë, ka nënshkruar marrëveshje edhe me Partinë Rome të Bashkuar të Kosovës.
Shaqir Totaj i PDK-së, kryetari aktual i Prizrenit që synon një tjetër mandat në krye të kësaj komune, mori 41.45% të votave në rund të parë.
Në disa komuna më të vogla, partitë kryesore, LVV, PDK, LDK e AAK kanë mundur t’i bëjnë disa marrëveshje për koalicion.
Kandidati i LVV-së për kryetar të Fushë Kosovës, Valon Prebreza, i cili mori 45.15% të votave, më 19 tetor e zyrtarizoi marrëveshjen për koalicion me AAK-në atje. Kandidatja e këtij subjekti politik, Vildane Latifi, kishte marrë vetëm 1.20% të votave.
Një koalicion më të madh në këtë komunë e arriti Besnik Osmani i LDK-së – kundërkandidati i Prebrezës, i cili në rundin e parë ka marrë 36.66% të votave. Ai nënshkroi marrëveshje me PDK-në, kandidati i së cilës, Rrahim Tërnava mori 16.15% të votave, si dhe me Nismën dhe Partinë Liberale Egjiptiane, që nuk kanë pasur kandidat për kryetar.
Në Vushtrri, kandidati i LDK-së për kryetar të komunës, Xhafer Tahiri, vendosi që ta nënshkruante një marrëveshje koalicioni me LVV-në, për ta mbështetur në rundin e dytë kandidatin e kësaj partie, Sylejman Mehollin, i cili u rendit i dyti me 30.81% të votave.
LDK-ja e kundërshtoi këtë koalicion, që tha se u bë pa miratim nga qendra dhe ndaj Tahirit, i cili mori 19.84% të votave, është paralajmëruar se do të merren masa pas balotazhit. Marrëveshja lokale atje konsiderohet e pavlerë nga kryesia në qendër.
Ferit Idrizi, kandidati i PDK-së në Vushtrri dhe kryetari aktual i komunës i cili në rundin e parë mori 45.24%, ka thënë se koalicionin e ka “me qytetarët”.
Agron Kuçi, kandidati i AAK-së, në rundin e dytë të garës për kryetar të Junikut ka mbështetjen e LVV-së atje. Ai mori 38.88% të votave në rundin e parë, ndërsa pas marrëveshjes së zyrtarizuar për koalicion, shpreson në 11.80% të votave të cilat kandidati i LVV-së atje, Jetmir Tofaj i mori në rundin e parë të zgjedhjeve.
Kandidati i LDK-së në Junik, Ruzhdi Shehu, ka marrë 48.89% të votave në rundin e parë.
Dragashi, Kaçaniku, Klina, Obiliqi, Rahoveci, Suhareka, Vitia, Mamusha dhe Kllokoti janë komunat ku gjithashtu do të ketë një garë të dytë finale në balotazh.
