Hegseth tha se “goditja kinetike vdekjeprurëse” u krye gjatë natës me udhëzimet e presidentit Trump kundër një anije të operuar nga Tren de Aragua (TdA), një grup që Washingtoni e ka shpallur organizatë terroriste
Sekretari amerikan i Mbrojtjes, Pete Hegseth, ka bërë të ditur se gjashtë persona janë vrarë pasi ushtria amerikane goditi një anije të dyshuar për kontrabandë droge në Detin e Karaibeve, transmeton Anadolu.
Në një postim në platformën sociale të kompanisë amerikane X, Hegseth tha se “goditja kinetike vdekjeprurëse” u krye gjatë natës me udhëzimet e presidentit Donald Trump kundër një anije të operuar nga Tren de Aragua (TdA), një grup që Washingtoni e ka shpallur organizatë terroriste.
Hegseth tha se anija po “tranzitonte përgjatë një rruge të njohur të trafikut të drogës” dhe mbante narkotikë dhe shtoi se operacioni u zhvillua në ujëra ndërkombëtare dhe se asnjë forcë amerikane nuk u lëndua.
Sekretari amerikan tha se gjashtë personat në bord, të cilët SHBA-ja i konsideroi “narko-terroristë”, u vranë në sulm.
Ky sulm shënon sulmin e fundit në një seri sulmesh të SHBA-së ndaj anijeve të dyshuara për trafik droge në Karaibe dhe Paqësor, si pjesë e fushatës së administratës së presidentit Trump kundër “narko-terrorizmit”.
Grupet e të drejtave të njeriut dhe ekspertët ligjor kanë vënë në pikëpyetje ligjshmërinë e operacioneve, duke argumentuar se sulmet e SHBA-së ndaj karteleve të drogës po i shtyjnë kufijtë e ligjit ndërkombëtar.
Eksperti më i lartë i OKB-së për anti-terrorizëm dhe të drejta të njeriut, Ben Saul, i dënoi operacionet këtë javë si “vrasje të paligjshme” sipas ligjit ndërkombëtar.
“Nuk ka autoritet në ligjin ndërkombëtar për përdorimin e forcës ushtarake në det të hapur për të vrarë trafikantë të dyshuar droge”, tha Saul në një konferencë për media në New York.
Presidenti Trump i mbrojti sulmet, duke i quajtur ato një përgjigje të ligjshme ndaj një “problemi të sigurisë kombëtare”.
