Ministria e Punëve të Jashtme dhe Evropiane e Kroacisë ka hedhur poshtë raportimet e mediave serbe se shtetas kroatë kishin planifikuar trazira në ditën e zgjedhjeve parlamentare në Serbi. Nga Ministria thonë se bëhet fjalë për vazhdimin e një sërë akuzash të pabaza ndaj Kroacisë.
Sipas agjencisë shtetërore serbe Tanjug, policia serbe ka arrestuar disa persona gjatë operacioneve në Novi Sad, Vrnjačka Banja dhe Beograd, nën dyshimin se po përgatitnin trazira të dhunshme në kryeqytetin serb në ditën e zgjedhjeve, më 25 tetor.
Tanjug raporton se dy prej të arrestuarve, Marko V. dhe Matej A., kanë shtetësi dhe pasaporta kroate. Nuk dihet nëse ata kanë edhe shtetësi serbe.
Marko V. u arrestua në Novi Sad dhe dyshohet se kishte organizuar një grup që synonte të shkaktonte dhunë në Beograd. Sipas informacioneve jozyrtare, ai kishte planifikuar të sillte rreth 80 persona në kryeqytetin serb.
Matej A. u arrestua në Vrnjačka Banja dhe dyshohet për thirrje për ndryshimin me dhunë të rendit kushtetues, si dhe për planifikimin e pjesëmarrjes në trazira.
Ministria e Punëve të Jashtme dhe Evropiane e Kroacisë, duke iu përgjigjur pyetjeve të HINA-s dhe Index-it, bëri të ditur se as Ministria dhe as Ambasada e Kroacisë në Beograd nuk kanë marrë njoftim zyrtar nga autoritetet serbe lidhur me arrestimet.
Gjithashtu, Ministria tha se nuk ka informacione të konfirmuara për rrethanat e rastit.
“Përshtypja është se bëhet fjalë për vazhdimin e një sërë akuzash të pabaza ndaj Republikës së Kroacisë. Veprime të tilla kanë një motivim të qartë të brendshëm politik”, thuhet në reagimin e Ministrisë.
KROACIA U REKOMANDON QYTETARËVE TË SHTYJNË UDHËTIMET NË SERBI
Ministria kroate u kishte rekomanduar qytetarëve që të martën të shtynin të gjitha udhëtimet jo të domosdoshme drejt Serbisë, ndërsa atyre që vendosin të udhëtojnë u kërkoi kujdes të shtuar.
Ministria paralajmëroi për mundësinë e tensioneve politike dhe incidenteve të sigurisë para, gjatë dhe pas zgjedhjeve.
Autoritetet kroate theksuan se bëhet fjalë për një rekomandim dhe jo për ndalim të udhëtimit.
Serbia më 14 tetor i kishte dërguar Kroacisë një notë proteste për shkak të pretendimeve për ndërhyrje në fushatën zgjedhore.
Kryeministri kroat Andrej Plenković i kishte cilësuar këto akuza si “absurditet i plotë”.
