Drejtori ekzekutiv i kompanisë ajrore Ryanair, Michael O’Leary, pret që çmimet e biletave të avionit në Evropë vitin e ardhshëm të rriten me 10 deri në 15 për qind, e ndoshta edhe me 20 për qind. Sipas tij, kjo do të ishte rritja më e madhe e çmimeve të biletave në histori.
O’Leary e bëri këtë deklaratë në një video të publikuar nga agjencia Reuters.
Edhe muajin e kaluar, Ryanair paralajmëroi për shtrenjtim të ndjeshëm të biletave nëse çmimi i naftës mbetej në nivelin e atëhershëm, ndërsa tani ka dhënë edhe një vlerësim konkret.
Ai shpjegoi se Ryanair dhe shumica e kompanive të tjera ajrore evropiane ishin të mbrojtura mirë deri në fund të vitit 2026 nga rritja e çmimeve të karburantit, falë marrëveshjeve që përcaktonin paraprakisht çmimin e blerjes. Kur shpërtheu lufta në Lindjen e Mesme në shkurt, Ryanair, sipas tij, kishte siguruar 80 për qind të karburantit me çmim prej 67 dollarësh për fuçi, deri në mars të vitit të ardhshëm.
Nga prilli i vitit 2027, Ryanair dhe shumica e kompanive të tjera ajrore evropiane kanë shumë pak mbrojtje të tillë, ndaj të gjitha do të paguajnë karburant dukshëm më të shtrenjtë.
O’Leary thotë se karburanti i aviacionit aktualisht kushton në treg rreth 140 deri në 150 dollarë për fuçi. Kjo është më shumë se dyfishi i çmimit që Ryanair paguan aktualisht.
Si arsye shtesë për shtrenjtimin, ai përmendi edhe taksat mbi transportin ajror. Belgjikën e veçoi si shembull të një vendi ku rritja e taksave do të sjellë reduktim drastik të fluturimeve dhe bileta shumë më të shtrenjta.
