– Sistemi mund të zgjerojë aftësitë e Moskës për mbikëqyrje në Evropën Veriore dhe Perëndimore, përfshirë Mbretërinë e Bashkuar, raportoi media britanike.
Rusia ka ndërtuar një instalim të madh radarik në eksklavën e saj perëndimore, Kaliningrad, i cili mund të detektojë avionë, raketa dhe mjete lundruese detare në një distancë deri në 3.200 kilometra, sipas raportimeve të mediave britanike, transmeton Anadolu.
Sistemi mund të zgjerojë aftësitë e Moskës për mbikëqyrje në Evropën Veriore dhe Perëndimore, përfshirë Mbretërinë e Bashkuar, raportoi të hënën gazeta The Times, duke iu referuar pamjeve satelitore.
Instalimi ndodhet pranë qytetit Gvardejsk, në Kaliningrad, një territor rus shumë i militarizuar, që kufizohet me vendet anëtare të NATO-s, Poloninë dhe Lituaninë.
Sipas raportimit, objekti përmban tri krahë me shtylla antenash që transmetojnë sinjale, secili me gjatësi prej 500 metrash.
Konfigurimi sugjeron se instalimi mund të jetë një radar përtej horizontit (OTH), një teknologji e projektuar për të detektuar objektiva përtej vijës së shikimit të sistemeve konvencionale të radarëve.
Radarët OTH përdorin radiovalë me frekuencë të lartë, të cilat mund të reflektohen nga jonosfera, duke u mundësuar detektimin e objektivave të mundshëm në distanca shumë më të mëdha sesa sistemet konvencionale.
Rrezja e raportuar e radarit vlerësohet nga 885 deri në 3.200 kilometra, duke i mundësuar potencialisht Rusisë të monitorojë aktivitetet ushtarake në pjesë të mëdha të Evropës.
Kaliningradi ka rëndësi strategjike për Moskën për shkak të pozicionit të tij në Detin Baltik, mes Polonisë dhe Lituanisë, të dyja anëtare të NATO-s.
